Vasina AtraZeneka, Governu Depende ba Organizasaun Mundiál Saúde

by -1.088 views

Timor Post (17/03/2021)—Primeiru Ministru Taur Matan Ruak klarifika pozisaun governu nian ba preokupasaun hotu kona-ba vasina ida ne’ebé maka di’ak liu ba Timor Leste bele uza hodi prevene moras daet COVID-19.

Iha mundu, nasaun barak maka mosu debate maka’as atu hili vasina ne’ebé di’ak liu. Iha Timor, Xefe Governu konsidera Organizasaun Mundiál Saúde (OMS) nu’udar konsilleru boot ba kestaun ne’e.

“Inkuantu organizasaun mundiál saúde seidauk hatete vasina ne’e ladi’ak, ne’e ita sei nafatin avansa ba AtraZeneka,” Taur Matan Ruak subliña ba Jornalista sira hafoin informa situasaun atuál rai laran no esforsu governu nian durante ne’e ba Prezidente Repúblika Francisco Guterres Lú Olo, Kuarta (17/03/2021).

Taur la ko’alia kona-ba governu maka sei ho osan rasik sosa vasina ka hetan de’it apoiu husi organizasaun mundiál balun.

Maske nune’e, Taur dehan, bainhira vasina seidauk to’o iha Timor, tanba COVID-19 fokus ba ema nia komportamentu maka nia dehan, sidadaun hotu hatudu komportamentu hodi kumpri regra sira atu maka moras ne’e sei la daet to’o hamate ema iha rai laran.

“Ita la halo milagre. Vasina seidauk iha, komportamentu. taka ibun, fase liman, labele halibur malu, kuandu moras ona informa lalais. Ne’e de’it. Liu ida ne’e laiha,” Taur salienta.

Entretantu komunikadu ba imprensa fó sai husi WHO fó komentáriu katak, iha nasaun balun iha Uniaun Europa temporariamente suspede uza vasina AstaZenaka, tanba bazea ba informasaun dehan vasina ne’e halo ran intupidu ba sira ne’ebé simu vasina ne’e, maibé iha nasaun balu mos dehan seguru liu uza vasina ne’e. (cao)

No More Posts Available.

No more pages to load.