Ustad Mohamad Nico husu Governu Tetu Hikas Polítika fo Subsídiu ba FP

by -417 views
Palásiu Governu

DILI (Timor Post)—Hafoin governu aprova kona-ba subsidiu alimentar no osan transporte ba Funsiunáriu Públiku (FP), situasaun ne’e hamosu pro-kontra iha públiku no ho subsídiu ida ne’e sei fo afeta ba iha povu ki’ik sira.

Konsellu Superior Masjid Bairru Pité, Ustad Mohamad Nico, konsidera polítika governu atu fó subsídiu alimentar ba funsionáriu públiku, ne’e governu kontinua hasusar povu ki’ik sira tanba sira laiha vensimentu mensal hodi sustenta sira nia moris.

“Governu presiza haree didiak, ita haree uluk populasaun sira ne’ebé terus hela, komesa husi tanggal 04 Abríl to’o ohin loron seidauk atende, balu sei hamlaha,” nia hato’o preokupasaun ne’e bainhira dada lia ho Timor Post, iha Bairru-Pite, Sábadu (25/09).

Nia konkorda kuandu hetan reasaun pro-kontra husi parte hotu inklui sosiedade sivil, tanba politika ida ne’e sei fo benefisiu deit ba FP, laos povu tomak.

“Ita haree ninia benefísiu ne’e ba se, kuandu ida ne’e la benefísia povu, entaun ema tenke ko’alia, funsiunariu kada fulan hetan salariu, enkuantu povu kbiit laek sira kontinua terus,” nia kestiona.

“Ema balun, atu han agora de’it mós laiha, apalagi ba aban nian.”

Tuir nia, governu halo diskriminasaun, governu la trata ninia povu la ho justu, liu-liu povu kbiit laek sira la trata ho dignu.

“Haree lai povu kbiit laek sira ne’e, sira ne’e mak estadu tenke tau matan no haree didi’ak, ita mate ho covid ne’e ema la dehan ita tanba ne’e moras mundiál, mais povu mate ho hamlaha, dignidade nasaun nian tau iha ne’ebé?, labele sai ukun ne’ebe la justu,” nia preokupa.

Entretantu, nia rekonese, katak ho subsidiu ida ne’e bele motiva komunidade, agrikultor sira bele badinas liu tan halo toos no natar, para bele aumenta kuantidade produsaun railaran.

Mais ba parte seluk, ema tenke haree programa governu nia atu sosa produtu lokál ne’e iha ka lae?, preparasaun iha ka lae, ne’e planu aban bainrua tinan liman ida foin iha karik, mais agora daudaun produtu sira ne’e iha ka lae?.

“Governu aprova osan juta ba juta ba sosa produtu iha rai laran hodi fahe, ne’e halo ema hadau malu produtu, bele to’o baku malu tanba hadau malu sasán, nia folin mós bele sa’e, agora governu hanesan ne’e, nia hanoin katak produtu lokál la sufisiente,” nia katak. (61L)

No More Posts Available.

No more pages to load.