UPF Laiha Kapasidade no Tenke Troka ho F-FDTL

by -1.032 views
Filomeno Paixão

Jornalista Jaime Pires / Editór Noémio Falcão

DILI (Timor Post)-  Ministru Defeza, Filomeno Paixão hatete, tenke troka no hasai duni Polísia Nasionál Timor Leste (PNTL)-Unidade Patroliamentu Fronteira (UPF) tanba sira laiha kapasidade atu hein iha fronteira terrestre entre Timor-Leste ho Indonézia.

Nia dehan lia hirak ne’e ba jornalista sira iha Parlamentu Nasionál, Tersa (24/08) ne’e hafoin partisipa iha debate estensaun estadu emerjensia ba dala-17 nia.

Nia dehan, nia part e uluk momentu sa’e ba ministru defende kedas atu hasai UPF husi fronteira hodi haruka fali Falintil Forsa Defeza Timor-Leste (F-FDTL), mak hein iha fronteira, tanba nia hare UPF laiha kapasidade no laiha koñesementu.

“Tanba ha’u nia koñesementu UPF la preparadu, nein tuur edukasionalmen, nein tuir kursu ne’ebé mak halo iha polísia ne’ebá no sira laiha edukadu sufisiente atu koloka iha ne’ebá”, dehan Nia.

Nia subliña, “ne’ebé ha’u hakarak kontinua hatete agora, sira la prontu atu hela iha ne’ebá, F-FDTL mak prontu hodi hela iha ne’ebá”, tenik Nia.

Nia mós subliña, tanba ne’e nia parte mós tuir hamutuk ona ho Vise Ministru Interior no oinsá atu koloka Forsa ba hein iha fronteira hamutuk ho UPF se lae F-FDTL mak iha oin UPF iha fali kotuk.

Tanba ne’e agora sei hare buat sira ne’e hotu no agora halo ona diskusaun no hare mós kona-ba rekursu sira ne’e hotu inklui material sira hotu, oinsá mak atu koloka Forsa ba iha fronteira.

Enkuantu Primeiru Ministru, Taur Matan Ruak mós Tersa (24/08) ne’e hatete iha uma fukun Parlamentu Nasionál katak, nia parte promet sei esforsu antes nia mandatu remata hasai ona UPF husi fronteira no haruka fali forsa mak hein ona iha fronteira.

No More Posts Available.

No more pages to load.