UNESCO Rekoñese Tais Timor Hanesan Patrimóniu Mundiál

by -382 views
Foto Espesial

Jornalista José Caet / Editór Noémio Falcão

Dili (Timor Post)—Organizasaun Nasoens Unidade ba Edukasaun, Siénsia no Kultura (UNESCO sigla Portugués) offisialemente rekoñese ona Tais Timor hanesan patrimóniu mundiál.

Reprejentante povu iha Parlamentu Nasionál orgullu notísia ida ne’e no felisita grupu soru nain sira ein jerál ba povu Timor Leste ho difikuldade oioin maibé mantein nafatin orijinalidade Tais Timor hodi ikus mai hetan duni rekoñesimentu internasionál.

Vise-Prezidente Parlamentu Nasionál deputada Maria Angelina Sarmento Lopes, agradese ba UNESCO nu’udar organizasaun mundiál ne’ebé liuhusi peskija hotu eskolla duni Tais Timor hanesan patrimóniu mundiál. hakarak kongratula inan feton soru na’in sira.

“Ha’u hakarak hato’o kongratulasaun no parabens ba povu doben Timor-Leste liu-liu soru na’in sira hotu no UNESCO,” Angelina hato’o felisitasaun iha sesaun plenária Parlamentu Nasionál, Kuarta (15/12/2021).

Iha fatin hanesan, deputadu Gabriel Soares, hato’o parabens ba povu Timor-Leste liu-liu inan feton soru na’in sira.

“Hori uluk kedas avo beiala sira mak halo tais no soru tais, sai hanesan vistuariu tradisional Timor nian,” Gabriél subliña.

Deputada Elvina Sousa Carvalho, felisita povu Timor-Leste tanba tais no identidade nasionál hetan ona rekoñesimentu internasional.

Nia rekomenda ba governu atu deside loron ida, sai loron nasionál hodi utiliza loron importante ne’e, enkoraza inan feton sira promove nafatin.

Prezidente Parlamentu Nasional Aniceto Longuinhos Guterres Lopes, promete iha sesaun plenaria normal meza sei aprezenta kongratulasaun ba soru tais ne’e.

No More Posts Available.

No more pages to load.