UNESCO Apoiu Fundu ba Hasa’e Koñesimentu Jornalista

by -70 views
Logo UNESCO

DILI (Timor Post)— UNESCO Jakarta fó apoiu fundus liuhusi Asosiasaun Jornalista Timor-leste (AJTL) fó formasaun ba jornalista sira ho objetivu hasa’e koñesimentu jornalista ba literária media hodi kombate disinformasaun iha Timor-Leste.

“Programa ne’e hala’o husi AJTL no hetan apoiu fundu husi UNESCO Jakarta hodi hasa’e koñesimentu jornalista atu kombate disinformasaun, oinsá atu kontribui ba hasa’e ita-nia kapasidade iha kobertura,” Prezidente AJTL, Zeovonia Vieira hatete iha abertura formasaun ne’ebé realiza iha salaun enkontru Radio Liberdade, Sábadu (14/08).

Nia dehan, formasaun ne’e sei hala’o loron 4, maibé kada loron sábadu de’it. Formasaun ida ne’e kada loron jornalista na’in-25 mak partisipa no formasaun ida ne’e ba de’it membru AJTL.

“Ida ne’e hanesan esforsu ne’ebé AJTL halo ba nia membru sira hodi hasa’e ita-nia kapasidade para oinsá ita bele iha abilidade hodi kontribui ba informasaun ne’ebé di’ak liután,” nia dehan.

Iha oportunidade ne’e nia husu mós ba jornalista ne’ebé tuir tiha ona formasaun bele habelar liután ba jornalista ne’ebé seidauk tuir formasaun hodi kontribui ba kombate disinformasaun.

Iha fatin hanesan, formadór Fernando Atoo Leki Nawa Costa, husu ba jornalista hotu atu kontribui kombate disinformasaun iha Timor-Leste.

Entretantu, matéria ne’ebé formadór fó iha formasaun ne’e mak hanesan dis-informasaun, miss-informasaun no mal-informasaun inklui jéneru. Partisipa iha formasaun ne’e mai husi media imprime, media online, radio no reprezentante radio komunidade sira husi Bobonaru no Baukau. (ono)

No More Posts Available.

No more pages to load.