Ular “Tentara” Estraga Batar To’os Éktares 115 iha Fatululik

husi -208 views

Timor Post (18/01/2021)—Pesti ho naran ular tentara estraga ona batar iha to’os laran éktares 115, iha Postu Administrativu Fatululik, Munisípiu Kovalima.

Reprejentante povu iha Uma Fukun Parlamentu Nasionál (PN) husi bankada FRETILIN, Deputadu Alexandrinho Cardoso haktuir, estensionista iha Fatulilik mak informa ba nia katak, akontesimentu ne’e mosu iha semana kotuk.

Liuhusi plenária PN, Alexandrinho husu ba Ministériu Agrikultura no Peska (MAP) atu toma atensaun imediata. Tanba nia haktuir, estensionista rasik  hato’o ona preokupasaun ne’e ba MAP Munisipál Kovalima maibé seidauk hetan resposta ruma.

Tuir Alexandrinho, bainhira laiha atensaun sériu maka pesti ne’e kontinua estraga batar komunidade sira nian iha Postu Fatululik no ida ne’e bele estraga ba produsaun primeiru epoka tinan ida ne’e nian.

Nia dehan kuandu pesti ne’e estraga hotu batar no ai haan  sira seluk mak komunidade bele afeta hamlaha.

Jornalista: Julio Salinas Soares

Editór: Noémio Falcão