Udan Hamate Eks Frater-BOP no Sidadaun Nain 12

by -124 views
Eks Frater Alcino

(Reportájem/Editor Suzana Cardoso)

 

DILI (Timor Post)-Udan durante loron rua, (3-4 Abril 2021) iha Dili no fatin besik seluk, hamate Polisia Nasional Timor-Leste (PNTL) husi Unidade Batalhao Ordem Públiku (BOP) nain ida. Eks Frater Salesiano Don Bosco (SDB), Alcino Sidadaun nain hitu mate. No nain lima seluk seidauk hetan.

Tuir informasaun ne’ebé Timor Post halibur husi netizen sira hateten, membru BOP ne’e komunidade sira dada sai husi Mota Maloa nia ain iha Aitarak Laran, iha loron Dominggu, (4/4/2021) maizu menus tuku 07.00 dader ho kondisaun raan iha parte ulun. Hatais kalsa badak, isin molik.

“Nia atu dada sai fahi. Sama kois maka mota lori nia ba tiha,” hateten ida husi familia membru BOP ho naran bolu Juliao ne’e, Tome Tilman.

Aliende ne’e, husi Mota Beduku iha Dominggu, (4/4/2021 madrugada populasaun mós hakfodak ho familia uma laran ema nain 5 mate. Nain nain rua feto no nain ida seluk labarik. Sira nain tolu mate hotu. No nain rua bebé seidauk hetan to’o agora.

Rai halai iha Suku Komoro, Aldeia Moris Foun, Bairu Malinamuk rezulta ema nain haat mate no nain 3 seluk deskonfia rai taka maka to’o notisia ne’e hatun seidauk hetan sira nia mate isin.

Vitima ida husi rai halai iha Malinamuk ne’e maka eks Frater iha Salesiano Don Bosco ho naran bolu Alcino mate hamutuk ho nia primu. Nune’e, sira ne’ebé identifika temporariu husi udan loron rua ne’e hamutuk nain 14 maka lakon vida.

Husi obserbasaun Timor Post hatudu, tantu mota boot no mota kiik sira hamutuk sia iha Dili laran nakonu. Mota Komoro nu’udar mota ne’ebé luan liu iha Dili. Nia ulun konsege sobu estrada ne’ebé foin halo hodi liga Dili ho Aileu.

“Uluk atu halo Estrada ne’e iha foho hun. Maibé, populasaun lakohi fo sira nia rai. Maka obriga a’an halo deit ona iha mota klaran. Nune’e kuandu mota tun nia buka nia dalan,” hateten Injenering ne’ebé lakohi temi nia naran wainhira ba hare fila fali estrada ne’ebé namout hotu ho mota Komoro.

Mota Komoro ho velosidade boot aliende hamout Estrada, sobu mós uma sidadaun sira besik mota ibun, hahu husi mota ulun to’o ponte Komoro. Uma andar ne’ebé luxu besik mota ibun mós naksobu hotu.

Mota sia iha Dili laran ne’e muta sai hotu hanesan lagoa mai estrada, hodi halo estrada hanesan fali mota. Liu-liu iha Palasiu Prezidente Aitarak laran to’o ema idade jovem nia kanotak. Kareta bee sae to’o odamatan. Palasiu Prezidente be’e hanesan tiha ho eskada odamatan oin.

Udan been ne’ebé tun husi foho lolon Maneluana no muta sai husi Mota Maloa suli ho velosidade mak’as hodi rezulta bee halai hotu ba SAMES, IP fatin rai aimoruk nian. Aimoruk hetan estragu hotu.

Komunidade iha Aitarak laran mós simu bee ne’ebé suli maka’as husi palasiu prezidente halo sira hotu tenki evakua ba edifisiu Ministeriu Financas.

Rai halai akontese mós iha Balide rai hun, hodi halo populasaun iha ne’eba evakua hotu mai edifisiu bombeiros Caicoli, Dili. Iha Becora, mota mós sobu komunidade nia uma. Aliende ne’e udan boot, halo be tasi sae mai too iha NOsa Senhora Imaculada Conceoção nia oin iha Largo Lecidere. (***)

No More Posts Available.

No more pages to load.