UD Palma Hatama Motorizada Unidade 552

by -1.182 views
Foto TP/Norberto Pereira

DILI (Timor Post)—Jerente Dealer Motor Honda UD Palma, Filomeno Batista informa, iha loron 07 fulan Outubru, nia parte hatama motorizada hosi nasaun Indonézia hamutuk unidade 552.

“Ami hatama motor hosi Indonézia mai Timor iha fulan Outubru ne’e hamutuk motor 552 unit. Antes atu tula mai Timor, ami tenke transfer osan ba iha Indonézia, depois hein to’o fulan rua ka tolu foin to’o mai iha Portu Dili,” Filomeno Batista ba Timor Post, Kinta (21/10).

Portantu kona-ba total osan ne’ebé UD Palma hasai hodi sosa motor hirak ne’e, Staf Administrasaun UD Palma, Fenny Benggu, informa osan hamutuk $700.000,00. No motor hirak ne’e sosa iha kompañia Honda Indonézia.

Maibé, nia dehan, ne’e depende ba customer ne’ebé mak presiza, tanba dala ruma kuantidade motor sa’e no bele tun, no motor sira ne’ebé fa’an iha ne’e nia marka oioin hamutuk 26, agora daudauk tama mai, mak hanesan CRF 150L ho kuantidade 12 unit, GENIO CBS 96, NEW BEAT SPORT CBS 120, NEW BEAT STREET 96, NEW VARIO 125 CBS 36, NEW VARIO 150 GOLD 4, NEW VARIO 150 SPORTY 8, REVO CW FI 30 no REVO FIT 150.

“Osan ne’ebé ami investe ba motor refere, ami hetan nia funan iha kada motor, kada motor ami fa’an ami hetan $100.00 bele mós $200.00, tanba ami sei selu impostu, selu portu, selu kontainer no selu STNK ho plat motor,” Fenny Benggu informa.

Kona ba motor saida mak customer sira gosta no sosa barak liu, nia hateten, motor ho marka NEW BEAT STREET 96 ho REVO FIT 150 barak liu. Kada motor ho nia folin la hanesan, motor nia folin bazeia ba ninia markasaun (merek).

“Motor hirak ne’e tama mai la to’o fulan, loron rua ka tolu de’it ema sosa hotu ona,” nia katak.

No prosesu hatama motor mai Timor, nia dehan, liu hosi prosesu naruk ida, ne’ebé presiza mós pasiénsia, motor hatama hosi Indonézia presiza hein to’o fulan, depois prosesu selu taxa, hein to’o sasán tama mai iha Porto Dili foin mak selu no sei ba selu iha iha Porto Dili, dala uluk selu uluk mak impostu, selu mós konteiner, Ró, portu no mós STNK ho Plat.

“Osan selu impostu $24.461.46, ba kontainer nian $80.00, ró nian $123.105, Portu $40.00 no STNK ho Plat ne’e selu bazeia ba kada motor, ne’ebé per unit hetan $60.00, sura hamutuk ho 552 unit hamutuk $33.120.

No durante pandemia covid-19, kuantidade motor ne’e tun, tanba hatene katak ne’e moras mundiál ne’ebé iha Indonézia sira la prodús motor ho kuantidade boot, tan ne’e motor tama mais mós nia kuantidade la hanesan uluk, no motor nia folin mós la hanesan ona, motor nia folin iha tempu pandemia nia laran kada motor aumenta mak $25.00 per motor. (PJ19)

No More Posts Available.

No more pages to load.