Transmisaun Lokal COVID-19 iha Dili, Lú Olo Kansela Serimónia Lansamentu Livru Bubere

husi -67 views

Timor Post (08/03/2021)—Haree ba kazu foun transmisaun lokál iha Díli, nu’udar dalan prevensaun no kontrolu ba COVID-19 atu la hadaet babeibeik, Prezidénsia Repúblika Francisco Guterres Lú Olo foti desizaun kansela serimónia lansamentu livru Buibere Hamriik Ukun Rasik An ne’ebé marka ba ohin, 8 marsu 2021, tuku 16.00.

Komunikadu ba imprensa husi Palásiu Prezidensiál ne’ebé Timor Post asesu haktuir, data foun ba serimónia lansamentu livru ne’e sei determina tuir evolusaun moras coronavírus iha rai-laran no medidas implementasaun Estadu Emerjénsia husi Governu.

Serimónia lansamentu livru Buibere Hamriik Ukun Rasik An  marka ba  8 marsu hodi  selebra Loron Internasional Feto no  mós nu’udar loron ida  atu fó-hanoin, rekoñese no valoriza  kontribuisaun feto Timor sira-nian  ba independénsia nasional Timor-Leste ne’ebé foi sai iha obra koletiva ida ne’e.

Maski serimónia ba lansamentu livru kansela, ita bele selebra nafatin  Loron Internasionál  Feto, iha ita ida-idak nia fatin, hahú kedas husi ita-nia uma laran, serbisu fatin no iha sosiedade atu hamutuk luta hasoru diskriminasaun oioin hasoru feto, violénsia doméstika no abuzu seksuál ne’ebé hamosu trauma oioin.

“Ita ida-idak tenke kontribui hodi ita hotu, feto no mane, moris ho laran-hamatek, domin no respeitu no nune’e, ita garante justisa sosiál, pás no estabilidade iha ita-nia Timor-Leste livre no independente.” Subliña iha komunikadu. (*/cao)