Traballadór Na’in-65 Aranka ba Korea Súl, Inan Faluk Hameno Lia Murak ho Matabeen ba Nia Oan

by -9.984 views
Foto TP: Cardenio Alves

Jornalista Cardenio Alves / Editór Noémio Falcão

Dili (Timor Post)—Sekretaria Estadu Formasaun Profesionál (SEFOPE) fasilita traballadór timoroan na’in-65 ba servisu iha Korea Súl.

Traballadór hirak ne’e semo ho aviaun Air Asia sai husi Aeroportu Internasionál Nicolau Lobato, Dili, Segunda (06/12/2021).

Traballadór hirak ne’e tuir teste lian Korea iha tinan 2019.

Diretór Diresaun Nasionál Empregu Exteriór, Filomeno Soares ba Jornalista sira bainhira akompañia timoroan sir aba to’o aeroportu, agradese ba governu Korea Súl tanba kontinua simu traballadór husi Timor Leste.

“Ita agradese ba governu Korea tanba demanda traballadór timoroan sira, maske tuir teste iha tempu COVID-19 nia laran, maibé Ita ohin loron hetan oportunidade dala ida tan,” Diretór Filomeno subliña.

Traballadór sira ne’e ba servisu iha area peskas no fábrika.

To’o agora, total traballadór timoroan servisu iha Korea Súl hamutuk rihun-tolu-atus-rua-haat-nulu (3240).

Ba Timor Post, traballadór Armindo Correia Sampaio hatete, kooperasaun governu rai rua fó oportunidade di’ak tebes ba timoroan sira liuliu foinsa’e sir aba servisu no hetan esperiénsia di’ak liu tan iha rai liur.

“Ha’u sente orgullu ba oportunidade ida ne’e, tanba ita hanoin hadi’a moris ne’ebé durante ne’e ha’u nia família hasoru,” Armindo subliña.

Inan-faluk trabailhador Armindo, Aguida Xavier hatete, nia ho nia oan mesak hafoin nia laen kaben hakotu iis sente moris ne’e difisil tebes, maybe ho oportunidade ida ne’e fó esperansa foun ba sira.

“Iida ne’e la’ós prosesu ne’ebé fasil,” Aquida ko’alia ho mata-been kontente nian. “Kuidadu-an ho di’ak to’o tempu ne’ebé oan fila mai ami,”  Aquida hameno ba nia oan.

No More Posts Available.

No more pages to load.