Traballadór 46 Asina Tan Kontratu Ba Austrália

by -1.885 views
Diretór Diresaun Nasionál Empregu Exterior Filomeno Soares kaer liman ho traballador ida hafoin asina deklarasaun, iha Salaun Bekora Dili Imajen TP/Natalino Sequeira Ello Abani

(Reportajen Natalino Sequeira Ello Abani/Asistente Editor Hermenegildo da Costa Tilman)

Dili (Timor Post)—Atu aselera viajen traballadór na’in 46 ba Austrália, ohin, iha Edifísiu SEFOPE, realiza asina deklarasaun entre governu liu hosi Sekretariádu Estadu Formasaun Professional no Empregu (SEFOPE) ho família traballadór.

“Objetivu konvida família traballadór atu mai asina deklarasaun ka akordu ne’e atu bele iha kompromisu ida katak bainhira traballadór ba Austrália mak iha problema ka dezastre ruma entaun husi parte rua hanesan governu SEFOPE-DNEE ho família sei responsavel hamutuk, dehan Diretór Diresaun Nasionál Empregu Exterior Filomeno Soares ba Jornalista sira iha salaun SEFOPE-DNN, Bekora, Tersa (26/04).

Nia hatete, Parte Governu nafatin fó korajen ba traballadór sira atu aproveita didi’ak oportunidade ida ne’e atu serbisu ho vontade, mantein iha sistema laran, kumpre nafatin regra husi kompañia rasik, kuidadu didi’ak saúde, serbisu no rai osan hodi fila mai Timor bele hadi’a ekonomia família uma laran.

“Husu ba família traballadór sira karik imi nia oan, la’en ka feen haruka osan mai favor boot ida, maneja didi’ak osan hodi hadi’a moris ka bele halo negosiasaun ki’ik ruma hodi tulun kondisaun uma laran nian”, nia hatutan

Alende ne’e mós reprezentante traballadór nain-46, Artur Ruas Brago, hatete, nia sente kontente tebes ho oportunidade ida ne’e tanba serbisu iha Australia ne’e la’ós manan de’it osan maibé esperiénsia hadi’a kualidade lingua English no buat seluk tan.

“Ha’u promete ba an rasik katak ha’u sei kumpre regra husi kompañia rasik, nafatin mantein tuir regulamentu ne’ebe mak SEFOPE no nasaun Australia fó mai ha’u hodi hala’o iha sistema laran,” nia dehan.

Husi traballadór Australia ne’ebe maka ohin família asina deklarasaun ho parte SEFOPE-DNEE hamutuk na’in-46 kompostu husi mane 39 no feto na’in hitu 7, sira sei ba iha kompañia tolu 3 hanesan Down to Earth, T And CDO and Son Pray LYD, Cable Beach ne’e kuaze serbisu hotu iha area Ortikultura no sira sei arranka ba Australia iha loron 27/04 fulan ne’e. (Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.