TLPU Ezije Governu Aselera Pagamentu ba Jornalista Frontline

by -340 views
Organizasaun Timor Leste Press Union (TLPU) hala’o konferénsia imprensa iha Jardín 5 de Maiu, Kuarta ne’e, hodi ezije governu aselera pagamentu ba jornalista frontline. Imajen TP/Cardenio Alves

(Reportajen Cardenio Alves/Asistente Editor Hermenegildo da Costa Tilman)

DILI (Timor Post)—Organizasaun Timor Leste Press Union (TLPU), ezije governu aselera pagamentu ba jornalista frontline sira, tanba to’o ohin loron seidauk simu sira nia direitu.

“Ami husu ba Governu tau matan mai jornalista Timor oan liu-liu ba direitu front line, tanba iha situasaun difisil, jornalista nafatin ativu hodi buka informasaun ne’ebé loos hodi publika ba komunidade atu labele pániku” dehan portavós Zezito da Silva, iha Jardín 5 de Maiu, Kuarta, (06/04).

Portavós husu ba governu labele hare de’it mak polítika ba ezekusaun programa ba dezenvolvimentu  maibé haree mós ba kondisaun jornalista iha front line.

“Tanba saida mak prosesu ne’e paradu iha Ministériu Finansas, karik dokumentu ruma mak seidauk kompletu ka iha erru tékniku ruma ne’ebé akontese karik bele komunika fila fali ba MAPKOMS atu bele hatutan ba mídia sira hodi prienxe rekizitu ho loloos,” deklara.

Nia dehan, TLPU nu’udar organizasaun ida ne’ebé fó mahon ba Jornalista timoroan tomak ho objetivu atu promove no defende direitu jornalista sira nian bainhira hala’o kna’ar profisionál iha órgaun komunikasaun sosiál.

TLPU la’ós organizasaun polítika ida ka la’ós organizasaun komérsiu, maibé hanesan mós asosiasaun kontrolu sosiál liu hosi atividade journalistic ho prinsípiu krítiku ne’ebé konstrutivu.

Bazeia ba prinsípiu ne’ebé mensiona iha leten mak TLPU haree katak direitu frontline jornalista sira nian to’o agora Governu seidauk responde maski Prezidente Repúblika promulga ona dekretu lei númeru 1/2022, 5 Janeiru kona-ba kriasaun subsídiu ba profisionál sira ne’ebé dezenvolve atividade journalistic.

Devér husi jornalista mak nafatin serve sosiedade iha kualkér situasaun maski iha risku ne’ebé boot, hanesan durante estadu emerjénsia nafatin, kontribui, ativa, hodi hato’o informasaun ne’eb kredivel no nesesária kona ba prevensaun no kombate pandemia iha territóriu nasionál hodi la fó pániku iha sosiedade

Durante ne’e TLPU akompaña prosesu tomak, parte sira balun hanesan Saúde, Autoridade Seguransa no seluk tan ne’ebé konsideradu frontline hetan ona sira nia direitu maibé to’o agora direitu jornalista sira nian Governu seidauk fó resposta.

TLPU husu ba Governu atu konsidera jornalista sira nu’udar frontline hanesan mós ekipa frontline sira seluk ne’ebé hetan ona suplementu remuneratoriu.

TLPU mós, husu ba Ministériu Finansas atu bele pronunsia buat ruma ba públiku liuliu jornalista sira nia direitu ne’ebé previstu ona iha dekretu lei. (Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.