TL Sei Apoiu Rihun $300 Ba Guiné Bissau

husi -261 views

DILI-Ministru Estadu Prezidénsia Konsellu Ministru Agio Pereira, hatete Timor-Leste (TL), sei apoiu finanseiru hamutuk rihun $300 ba Guiné Bissau nune’e bele realiza eleisaun prezidensiál iha fulan Novembru tinan 2019.

“Deliberasaun kona-ba Guiné Bissau ne’e ita boot sira hatene sei iha eleisaun prezidensiál iha fulan Novembru 2019, ne’e mak ita nia Governu sei apoiu finanseiru ho valor rihun $300,”nia hatete ba jornalista sira hafoin reuniaun Konsellu Ministru iha Pallasu Governu, kuarta (11/09).

Nia hatete, Governu Timor Leste sei apoiu, tanba foin lalais Prezidente Guiné Bissau mai partisipa iha komemorasaun loron konsulta popular ne’e husu ba Primeiru Ministru Taur Matan Ruak, atu Timor-Leste bele apoiu atividade eleitorál iha nasaun refere.

Nia haktuir, kestaun ne’e Ministru Administrasaun Estatál (MAE), interinu Abílio José Caetano nomeia señór Tomas Cabral hodi lidera ekipa ida atu bele fó apoiu ba Guiné Bissau ninia atividade eleisaun prezidensiál ne’ebé sei realiza iha tinan ne’e.

“Konsellu Ministru aprova proposta deliberasaun ne’ebé aprezenta hosi ita nia Ministru Administrasaun Estatál interinu Abílio José Caetano, kona-ba apoiu finanseiru Timor-Leste ba eleisaun Prezidensiál Guiné Bissau iha fulan Novembru 2019 ne’e importante,” hatete Agio.

Nia hatete, Konsellu Ministru mai ho forma ida ne’e atu responde kona-ba pedidu apoiu tékniku no finanseiru ba organizasaun no realizasaun hosi eleisaun prezidensiál ne’ebé solisita hosi governu Gineense.

Ikus liu nia hatete, Governu Timor-Leste sei fó apoiu finanseiru ho valor rihun $.300 ho nomeasaun Tomas do Rosario Cabral, hanesan reprezentante espesiál governu nian ho misaun atu prosede identifikasaun hosi obstakulu ba organizasaun no realizasaun hosi operasaun resenseamentu eleitorál no hosi eleisaun livre no loloos. (oro/sfj14/sfj15)