TL Hetan Apoiu Tenda 220 Hosi Australia

by -325 views
Tenda - Governu Australia fó apoi tenda 220 ba vitima inundasaun ne’ebé tula liu hosi aviaun MY JET XPRESS AIRLINES ho Marka 9M-NEY, Malazia mai TL, too iha Aeroportu Nicolau Lobato Komoro, Sabadu 08/05/2021. (Foto TP/Maria Lizia)

(Reportájem Cesário de Sousa/Editor Suzana Cardoso)

DILI (Timor Post) – Atu fasilita vitima afeta ba dezastre naturais iha loron 4 Abril 2021, maka Governu Australia liu husi World Food Programme (WFP) ne’ebe baze iha Nasaun Malazia apoiu tenda 220 ba governu Timor Leste (TL).

Ba Timor Post Diretor Jeral Sekretariu Estadu Protensaun Sivil (SEPS), Esmail Babo hateten, Governu TL hetan apoiu umanitaria hosi Governu Australia liu husi WFP ho total tenda hamutuk 220.

“Governu TL hetan apoiu husi Governu Australia koordena hamutuk ho organizasaun mundiál, WFP ne’ebé mak baze iha Malazia. Hamutuk tenda 220,” informa Esmail iha Aeroportu Komoro, Sabadu, (08/05) wainhira simu oficialmente tenda hirak ne’ebé transporta hosi Aviaun.

Nia hatutan, tenda sira ne’e sei apoiu ba populasaun sira ne’ebé nia uma hetan estragu husi dezastre naturais iha fulan kotuk. Apoiu sira ne’ebé ohin too mai nee tenda hotu deit.

“Protesaun sivil hamutuk ho WFP sei forma ekipa hodi hetan formasaun molok distribui tenda hirak ne’e ba fatin sira ne’ebé determina ona. Tenda hirak ne’e sei tau prioridade ba Munisipiu Dili. No nia resin mak sei aloka fali ba munisipiu seluk,” esplika Esmail.

Apoiu Umanitaria tenda 220 ne’e transporta husi Aviaun MY JET Xpress ho marka 9M-NEY tun iha aeroportu Presidente Nicolau Lobato Komoro, maizu menus tuku 14:30 Oras TL.(Lee notisia seluk iha jornál Timor Post)

No More Posts Available.

No more pages to load.