Tiru Mate Na’in Rua, Se Tan Pistola Maibé Kilat Musan Mak Hotu

husi -10.340 views
Oknum Membru PNTL tiru mate iha fatin, Matebian Mateus de Deus no Camilio de Deus iha Lahane

(Reportájen Jaime Pires/Editor Suzana Cardoso)

DILI (Timor Post) – Oknum Membru Polísia Nasionál Timor-Leste (PNTL) ida, tiru Mate nain Mateus ho nia oan mane hodi rezulta nain rua mate fatin no nain ida Kanek todan. Lato’o ba ne’e deit. Oknum membru PNTL ne’e  sei tan pistola hodi tiru tan joven ida. Maibé tanba kilat musan mak hotu ona, nune’e lakonsege hetan tiru.

Lia hirak ne’e hato’o husi sasin no familia Matebian Mateus de Deus no Camilio de Deus, Francisco Borges ba Timor Post iha Sala Mortuariu Hospital Nasionál Guido Valadares (HNGV), Sabádu, (05/06/2021).

Nia Dehan, família oknum PNTL ne’e nia problema sira la hatene. Tanba saida mak ohin madrugada tuku rua nia lori Pistola Estadu ninia ba asaltu familia Vitíma ne’e ho nia família hodi tiru mate Vitíma ho nia oan mane inklui tiru Vitíma nia mane foun hetan Kanek todan.

Hateten Francisco, akontesimentu ne’e akontese iha suku Lahane Osidental, Aldeia Ainiras Hun. Oknum polísia lori Pistola ba tiru mate Mateus de Deus ho Nia oan mane Camilo de Deus.

“Ami Lamenta tebes tanba polísia sai hanesan lutu ba nasaun ba hasai fali povu nia vida iha situasaun ida ukun an ona ne’e,” lamenta Francisco.

“Ema ida ne’e mós veteranus. Uluk kaer kilat hodi defende rai ida ne’e, dezde okupasaun Indonézia nia tempu. Nia la mate iha funu laran, agora nia mate fali iha tempu ukun an ne’e mak ita sente la merese”, katak Francisco.

Nia deklara, família ezije tebes ba hahalok ida ne’e. Ba PNTL no parte justisa no parte relevante Ita hotu hodi foti asaun imidiata ba kazu ida ne’e.

“Sira la’ós animal hodi lori fali kilat nasaun nia ne’e ba kada fali sira iha sira nia uma hodi tiru mate sira”, konfesa Francisco.

Nia subliña, membru polísia ne’e dala ruma bulak ne’e mak lori kilat ba asaltu ema iha ema nia uma hodi tiru mate. Tanba família ne’e nunka halo problema ho membru polísia ne’e.

“Ami familia durante ne’e laiha problema ho oknum Membru Polísia Mariano ne’ebé mak tiru ami nia aman no ami nia alin mate. Maibé nia mai asalta madrugada ne’e mak nia motivu saida los”, dehan Francisco.

Nia konta, oknum membru polísia Mariano ne’e tiru mate tiha nain rua tiru. Ida Kanek todan. No ida seluk se tan pistola ba alin mane ida atu tiru, maibé kilat musan mak laiha ona. Lae sira nain haat mak mate hotu.

Enkuantu mate isin nain rua iha ona, Hospital Nasionál Guido Valadares, no ida Kanek todan ne’e mós halo hela Testamentu iha HNGV Bidau. (Lee notisia kompletu iha Jornal Timor Post)