Tinan Rua Sein Vensimentu, Traballadór Seguransa Lorosa’e Na’in-468 Hato’o Keixa ba PN

by -221 views

Timor Post (13/01/2021)-Traballadór 468 maioria eis petisionáriu ne’ebé servisu iha estasaun no Sentrál Elétrika, Kinta (13/01) hosi kampaña Seguransa Lorosa’e hato’o keixa ba Komisaun E iha Parlamentu Nasionál tanba durante tinan rua servisu sein vensimentu.

Koordenadór Guarda kampaña Seguransa Lorosa’e hosi estasaun Munisípiu Baukau, Cipriano Hornay Sarmento da Silva, haktuir istória salariál hosi hahú (2011) la’o normal to’o 2018. Maibé hosi 2019 to’o agora servisu de’it.

“Ohin ami mai iha parlamentu nasionál hato’o ami nia direitu ba Prezidente Komisaun E, hodi bolu atensaun ba governu para resolve tiha”, aprezenta iha entrevista hafoin remata enkontru ho Komisaun E Parlamentu nasionál, Kuarta (13/01).

Entretantu  Prezidente Komisaun E, Abel Pires, rekoñese traballadór hirak ne’e sira nia problema kleur ona, tanba mudansa kontratu iha Juñu 2019, tanba ne’e dezde kedas Jullu 2019 maiske traballadór sira hala’o sira nia knar maibé sira la simu saláriu.

Lider komisaun espesializada ne’e informa nia parte hato’o beibeik ona ba iha plenária, relatóriu komisaun E nian ba fiskalizasaun mós hato’o hela de’it,  infelismente to’o ohin loron ita sei dauk resolve.

“Situasaun ne’e sai preokupasaun boot ba komisaun no hatama iha ajenda komisaun nian oinsá atu bele resolve situasaun ida ne’e iha tinan ida ne’e nia laran”, hatán Pires.(Jornalista : Julio Salinas Soares, Mariano Martins)

No More Posts Available.

No more pages to load.