Tinan 80 Arkidioseze Dili, Don Virgílio: Dala barak Ita Kontra Lei

by -79 views

Timor Post (09/12/2020)—Iha loron 8/12/2020, Timor Leste selebra tinan 80 Arkidioseze Díli. Iha selebrasaun ne’e, Arsebispu Metropolita Díli,  Don Virgílio do Carmo da Silva,  S.D.B. subliña, dala barak sarani sira kontra lei.

Nune’e, ulun boot dioseje Dili ne’e husu ba sarani tomak atu halo reflesaun iha ida-idak nia moris atu nune’e halo buat ne’ebé loos iha Maromak nia futar-oin no ba ema hotuhotu iha moris tomak.

Selebrasaun loron ida ne’e partisipa husi Bispu na’in rua, Bispu Dioseze Baucau, Don Basílio do Nascimento no Bispu Dioseze Maliana, Don Norberto do Amaral.

Selebrasaun loron ida ne’e monu mós iha loron ne’ebé Igreja Katólika selebra loron Na’in Feto Imaculada da Conceição nu’udár mahein ba ba Arkidioseze Díli no mós mahein ba nasaun Timor-Leste.

“Maromak nia futar-lia konvida ita atu foku de’it ba buat ida mistériu salvasaun. Ne’e duni maluk doben sira saída loos Maromak hein husi ita, entaun ita-nia destinu mak ida ne’ebé molok atu hakiak mundu Maromak haraik kedas ona ita atu ita moris nu’udár ema santu, moris nu’udár ema sala la’ek iha Nai nia futar-oin,” Don Virgílio subliña iha nia omília iha Igreja Katedral, Dili.

Entretantu iha selebrasaun loron importante ida ne’e, Prezidente Repúblika Francisco Guterres Lú Olo hato’o mós mensajen ba sarani tomak.

“Nu’udar Prezidente Repúblika, atu ita hotu selebra hamutuk loron importante ida  ba istória Diocese Dili nian,  ba Igreja Katólica tomak no ba mós  Povu Timor-Leste,” Xefe Kaza Sivíl Francisco Vasconselhos lee Xefe Estadu nia mensajen iha Katedral, Dili.

Ho  haksolok boot mak Prezidente Repúblika, ho Estadu nia naran,  rekoñese no valoriza  kontribuisaun boot husi Igreja Católica ne’ebé hala’o  ninia misaun evanjélika  hamutuk ho edukasaun no formasaun ba timoroan sira.

Husi eskola  katólika sira, hahú husi ensinu pré-primáriu to’o fali eskola profesor katekista, eskola Profesores Posto Eng Canto Resende, no husi Colégio de São José/ Dare, Colégio de Santo António/Lahane, Escola de Artes e Ofícios, Colégio Imaculada da Conceição no Colégio Nuno Alvares, iha Soibada,  Colégio de S. Isabel, iha Manatuto,   no Colégio de Santa Terezinha, iha Viqueque, no mós husi Semináriu sira, mak maioria timoroan sai  matenek-nain, iha área oioin.

Liuhusi instituisaun sira ne’ e mak maioria líder-sira iha Rezisténsia Timorense simu edukasaun no mós formasaun kona-ba moral no étika. Instituisaun sira ne’e kontribui maka’as ba hasa’e kbiit ba  ita-nia ema sira ne’ebé  kaer ona ka sei kaer hela knaar importante iha órgaun Estadu nian, entidade públika no privada no iha fatin sira seluk, iha ita-nia Timor-Leste livre no independente. (cao)

No More Posts Available.

No more pages to load.