Timoroan Na’in-352 Tama Ilegál ba Indonézia hetan Deportasaun

by -282 views

Jornalista Jaime Pires / Noémio Falcão

DILI (Timor Post)–Autoridade Seguransa Repúblika Indonézia liuhusi Kapolres Belu, Dandim no Migrasaun deporta timoroan na’in-352 ne’ebé tama ilegál ba Atambua-Nusa Tengara Timur (NTT). Timoroan hirak ne’e involve iha Grupu Arte Marsiál Persaudaran Setia Hati Terate (PSHT).

Membru hirak ne’e tama ilegal ba Atambua ho objetivu hasa’e sintu (sabuk).

“Ohin, ofisialmente autoridade seguransa Indonezia nian, entrega hikas ita nia sidadaun timoroan ho total hamutuk ema na’in-352 ne’ebe atravesa ilegalmente ba Indonezia hodi tuir graduasaun ba Grupu Arte Marsiais PSHT,” Komandante UPF (Unidade Patrullamentu Fronteira), Superintendente Polísia Euclides Belo ba jornalista sira iha Postu Integradu Mota-Ain, Kinta (19/08/2021) kalan.

Nia dehan, timoroan hirak ne’e nia parte halo ona identifikasaun no daudaun entrega ona-ba Sentru Integradu Jestaun Krize (SIJK) transporta ba Dili hodi kumpri kuarentena durante loron 14 nia laran hafoin sei prosesu tuir lei ne’ebe vigor tanba kontra ona regra Estadu Emerjensia (EE) hodi hakat sai hosi Timor-Leste ba Indonézia ilegalmente.

“Ami servisu koordenadu ho autoridade sira ne’ebe servisu iha liña fronteira, espesialmente ba Sentru Integradu Mota Ain, durante prosesu tomak ami kumpri ona regra no prosedimentu tuir protokolu ne’ebe estabelese hela iha ita nia rain”, subliña.

Euclides hatutan, nia parte mos simu estudante nain 109 hosi Indonezia ne’ebe desidi fila mai Timor tanba pasaporte kaduka no fixa mate inklui mos timor oan nain 36 ne’ebe la konsege ba servisu iha inglatera tanba konsidera Indonezia kategoria zona mean ba Covid-19.

No More Posts Available.

No more pages to load.