Timoroan ho Estranjeiru na’in-89 husi Filipina too ona Dili, Kuarentena iha Tibar no Tasi Tolu

by -110 views

Timor Post (06/11/2020)- Aviaun Cebu Pasific hosi Filipina tula sidadaun timoroan no estranjeiru hamutuk 89 to’o ona iha Aeroportu Nicolau Lobato Dili, sesta (06/11) lokraik tuku 16:00.

Enkuantu aviaun ne’e timoroan hamutuk 71 no estranjeiru hamutuk nain 8 inklui Padre ida hosi Vietname no Madre nain rua hosi Filipina.

Timoroan 71 ida ne’e balun estudante bolseiru inklui mós sidadaun timoroan sira seluk hamutuk ho sidadaun estranjeiru nain 8 ne’e mak aluga aviaun rasik hodi loris sira fila mai Timor-Leste.

Bainhira too iha Aeroportu Dili, parte saude hamutuk ho autoridade kompetente akompana kedas ba kumpri kuarentena durante loron 14 iha kuarentena Tibar no Tasi Tolu.

Aluga Aviaun Cebu Pacific Ho Montante $55 Mill

Entretantu Diretor Nasionál Asuntu Konsolar ba Komunidade Timorense (MENEK), Armindo da Silva Pinto haktuir, aviaun ne’e estudante sira mak aluga rasik, no sira tau osan hamutuk ho montante $55 mill.

Armindo deklara, kona-ba montante kada ema ida tau hodi aluga Aviaun ne’e nia la lembra loos maibé nia dehan ema ida tau $750 dolar amerikanu.

Diretor dehan, ema hamutuk 89 nee tama iha kuarentena Tasi Tolu no mós Tibar.

“Ba timoroan sira ne’ebé mak mai iha kuarentina governu mak sei fasilita hotu durante loron 14 maibé ba estranjeiru sira rasik mak selu” Nia hakotu.

(Jornalista Jaime Pires)

No More Posts Available.

No more pages to load.