Timor-Leste Tama Asean, Setór Privadu Tenke Prepara An

by -222 views

DILI-Reitór Institute of Business (IOB), Augusto da Conceição Soares, hatete Timor-Leste (TL), se tama organizasaun Association of south east Asian nation-ASEAN, setór privadu sira tenke prepara an.

Nia hatete, setór privadu sira tenke prepara an ona, tanba bainhira Timor-Leste tama ona Asean, ne’e adopta ona merkadu livre, entaun sira sei kompete ho emprezáriu internasionál sira.

“Se kuandu ita adere ba ASEAN, setór privadu sira tenke pro-ativu, inovativu no kriativu, maibé la prepara an ho didi’ak entaun empreza internasionál sira mak sei domina,” nia hatete iha kampus IOB Fomentu, tersa (10/09).

Tuir reitór IOB ne’e katak, bainhira Timor-Leste adere ona ba ASEAN entaun sei adopta merkadu livre ne’e sei iha vantajen no dezvantajen.

“Ha’u hanoin ninia vantajen ba ita mak bele kria kampu servisu ba ita nia joven timoroan sira, maibé ninia dezvantajen ne’e mak ita nia empreza nasionál sira seidauk bele kompete ho empreza internasionál sira,” nia preokupa.

Nia hatete, daudauk ne’e Timor-Leste seidauk adere ba ASEAN, maibé empreza internasionál sira domina ona iha rai laran, hanesan iha area Hudi Laran nian agora sai fali China Laran.

Nia hatutan, problema ne’e ema mai ho osan boot hodi halo negósiu, enkuantu empreza nasionál sira hein de’it projetu governu nian sai mak foin iha osan.

Tan ne’e nia hatete, loloos ne’e empreza timoroan sira labele hein projetu governu, maibé kuandu iha osan uitoan tenke halo negósiu hodi fan sasán konstrusaun nian hanesan Simente, Besi Baja, Ai, kalén no mós sasán sira seluk, nune’e osan bele sirkula de’it iha rai laran.

Alende ne’e nia hatete, Timor-Leste seidauk adere ba Asean, Governu ho Parlamentu Nasionál kada tinan aprova orsamentu ho montante boot, maibé barak mak sai ona ba rai li’ur. Tanba ne’e agora Governu Presiza tetu didi’ak bainhira atu tama Asean.

“Ita tenke hare progresu ne’ebé akontese iha ita nia rain, barak liu mai hosi orsamentu jerál estadu nian, la’ós mai hosi papél setór privadu sira nian, tanba ne’e ita husu governu tenke kapasita ita nia setór privadu sira,” nia hakotu. (oro/ono)

No More Posts Available.

No more pages to load.