Timor Leste Seidauk iha Lei Reforma, Funsionáriu Públiku Liu Rihun Rua Hatama ona Rekerimentu

by -809 views
Faustino Cardoso

Jornalista Jaime Pires / Editór Noémio Falcão

DILI (Timor Post)—Prezidente Komisaun Funsaun Públiku (CFP sigla Portugés), Faustino Cardoso hatete, lei maka bele fó biban ba komisaun atu hala’o kna’ar obriga funsionáriu públiku ho idade liu 60 reforma hodi fó oportunidade ba jerasaun foun sira.

“Ita to’o agora lei kona-ba reforma lenumeru 12/2016 seidauk iha artigu ida atu obriga funsionáriu sira idade 60 liu ona tenke reforma,” Faustino bá Jornalista sira hafoin reuniaun ho Primeiru Ministru Taur Matan Ruak iha Rezidénsia Primeiru Ministru, Farol, Dili, Segunda (18/10/2021).

Relasiona ho kestaun ne’e, Faustino haktuir, Parlamentu Nasionál ajenda ona alterasaun ba lei númeru 12/2016 kona-ba seguransa sosial hodi tau artigu ida obriga funsionáriu públiku idade 60 tenke reforma husi funsaun.

“Parlamentu Nasionál tenke halo tiha artigu ida no define idade 60 tenke reforma ona husi Funsionáriu Públiku, atu nune’e Komisaun Funsaun Públiku hamutuk ho instituisaun sira seluk bele implementa ida ne’e,” nia hatutan.

Entretantu Faustino haktuir, maske lei seidauk iha maibé durante ne’e CFP simu ona rekerimentu reforma husi funsionáriu sira idade 60 ba leten liu rihun-rua no goza ona sira nia direitu tuir grau ne’ebé iha.

Nia dehan, to’o agora funsionáriu permanente no ajente administrasun públika hamutuk 35,525.000, la-inklui sira ne’ebé mak kategoria kazual ka selu ho orsamentu husi bens servisu nian.

No More Posts Available.

No more pages to load.