Timor Leste Lutu Nasional Durante Loron Tolu ba Jorge Sampaio nia Mate

by -287 views
Imajen ne’e hatudu iha Palásiu Governu, Dili dada bandeira RDTL meia haste. Foto Jaime Pires

Jornalista Jaime Pires / Editór Noémio Falcão

DILI (Timor Post)—Governu liuhusi Konsellu Ministru deside durante loron tolu nia laran Timor-Leste hasa’e Bandeira RDTL to’o de’it klaran (meia haste) ba eis Prezidente Repúblika Portugál Jorge Sampaio nia mate.

Dada bandeira meia haste ne’e nu’udar símbolu Lutu Nasionál tanba konsidera Jorge Sampaio hanesan mós autór defende libertasaun nasional Timor Leste.

“Durante períodu lutu nasionál, bandeira nasionál sei hasa’e to’o klaran de’it ka meia haste iha país laran tomak, iha fatin sira uzu obrigatória nian,” Ministru Prezidensiál Konsellu Ministru, Fidelis Leite Magalhães ba Jornalista sira, iha Palásiu Governu (13/09/2021) hafon reuniaun Konsellu Ministru.

Jorge Sampaio mate iha loron 10 fulan-Setembru 2021.

Jorge Sampaio nu’udar konvidadu da onra iha serimónia ne’ebé hala’o iha loron 20 fulan-maiu tinan 2002.

Saudozu nu’udar fígura boot iha kauza no liberdade no rekoñese nu’udar Belun Boot Timor-Leste no timoroan nian

Iha tinan 2016, Jorge Sampaio simu Grande Kolar Ordem Timor-Leste,  nu’udar rekonesimentu ba ninia solidariedade no apoiu ativu iha luta ba independénsia Timor Leste.

Iha ninia vizita ikus nu’udar Xefe Estadu, iha tinan 2006, Parlamentu Nasionál atribui ba Jorge Sampaio títulu Sidadaun Onoráriu Repúblika Demokrátika Timor-Leste.

Porta-Vóz Governu nian, Ministru Fidelis Magalhães, iha loron sesta semana kotuk, aprezenta kondolénsia ba família no belun ies-Prezidente no afirma katak “Jorge Sampaio sempre rekordadu husi povu timor ba ninia kompromisu ne’ebé kle’an ba direitus umanus, justisa no solidariedade”.

Tuur observasaun Timor Post, iha Palásiu Governu, Dili, dada Bandeira RDTL to’o de’it iha klaran.

No More Posts Available.

No more pages to load.