Timor-Leste Kuntinua Oferta Esforsu Hodi Adere ba OMK

by -361 views

DILI (Timor Post)—País Membru OMK (Organizasaun Mundiál Komérsiu) kuntinua ezamina   rejime komersial  Timor-Leste nian liuhusi reuniaun Grupu Traballu Daruak (Second Working Party Meeeting).

Reuniaun  virtual ne’ebé hala’o iha loron 29 Jullu 2021 ne’e prezidi husi Embaixador Rui Macieira husi Portugal.

“Adezaun ba OMK nu’udar parte integrante husi ami nian kompromísu bazea ba órden no regras,” hatete José Ramos-Horta, eis Prezidente Timor-Leste no Laureadu Prémiu Nobel da Paz, ba delegasaun ema na’in-81 kompostu husi funsionáriu governu no ministru na’in-9 iha reuniaun virtual ne’ebé hala’o iha kapitál Dili hamutuk ho entidades sira husi Jenebra.  “Timor-Leste  totalmente empeña hodi kumpri prinsípius, objetivu no regras husi OMK,” subliña José Ramos Horta iha karta komunikadu ba imprensa ne’ebé Timor Post assesu, Tersa (10/08/2021).

Ministru Koordenador Asuntu Ekonómiku no Xefe Negosiador Adezaun Timor-Leste ba OMK, Joaquim Amaral, kuntinua atualiza kona-ba serbisu hirak ne’ebé halo tiha ona depois reuniaun dahuluk Grupu Traballu nian ne’ebé realiza iha Outubru 2020.

“Timor-Leste kuntinua hakat ba oin kona-ba  adezaun nee hodi  dezenvolve no fornese hanoin hirak ne’ebé hato’o husi pais  membru sira inklui Ofertas   Asesu ba Merkadu kona-ba Bens no serbisus nian ne’ebé  distribuí tiha ona ba membru Grupu  Traballu sira iha Maiu no Juñu tinan nee. Hau mos hakarak  informa ba Grupu  Traballu sira katak Timor-Leste hahu’u ona  halo konsultasaun bilaterais kona-ba asesu ba merkadu ho  membru interesadu sira bazeia ba ofertas ne’ebé mak hato’o mai ami,” katak Xefe Negosiador Adezaun Timor Leste ba OMK

Adjuntu Diretor-Jeral  OMK, Xiangchen Zhang, hato’o komentariu positivamente kona-ba  dedikasaun husi Pais Menus Dezenvolvidu ( PMDs) kona-ba prosesu  adezaun ba OMK, maske hasoru  dezafiu tanba pandemia.

“Timor-Leste nu’udar pais PMDs  foun  iha prosesu  adezaun nee. Prosesu nee hahu’u iha 2016 no  agora hatudu  velosidade ne’ebé lais. Hau nia rekomendasaun nu’udar eis-negosiador adezaun nian no mos eis-prezidente  Grupu  Traballu  adezaun  PMDs nian  hodi kuntinua  mantein esforsu ho serbisu ne’ebé diak ”, hatete  Xiangchen Zhang .  “ Sekretariadu  prontu koordena ho  asistênsia téknika  husi nesesidades  PMDs nian  hodi nune’e bele fo resposta ho tempu ne’ebé lais”

Membru  hirak ne’ebé partisipa iha  reuniaun nee halo revizaun kona-ba negosiasaun bilaterais  asesu merkadu nian no kontinua análize mos  rejime komérsiu eksterna  Timor-Leste nian bazeia  ba dokumentus ne’ebé hato’o husi Grupo Traballu.  Analize mos  kestoens  lejislativu nian hodi  konsidera iha prósima  passu prosesu  adezaun nian.

“Reuniaun  nee dala idatan konfirma Timor Leste nia  vontade ne’ebé forte hodi sai parte  OMK nian ho mais rapida no  posível, ho nia disponibilidade hodi envolve nu’udar membrus atu  define mos iha futuru  termu kona-ba  adezaun nian hodi  halo mos asoens polítika hirak ne’ebé  nesesáriu.” hatete Prezidenti Reuniaun Grupu Traballu  no Embaixador Rui Macieira husi Portugal

Vice-Ministro  Komérsiu no Indústria, Domingos Lopes Antunes, akresenta mos  iha ninia konkluzaun kona-ba  reuniaun nee katak  Timor-Leste kontinua aselera ninia partisipasaun iha prosesu  adezaun nee hodi kontinua buka  asistênsia nesesária  husi parseiru sira.

“Hau fiar katak ami sei tuir   roteiru  adezaun ne’ebé hato’o husi Sekretariadu  OMK nian  haktuir husi planu ne’ebé iha hodi  garante ami nian  vontade tomak  iha  tinan oin mai, maske ho dezafiu globais husi Pandemia  COVID-19 ne’e,”deklara Antunes.

Reuniaun Grupu Traballu Daruak ne’ebé fasilita husi Sekretariadu Adezaun Timor Leste ba OMK husi MCAE hala’o iha salaun enkontru Ministériu Negósius Estranjeirus no Kooperasaun no hetan partsipasaun másimu husi membrus Governu sira hanesan Ministru Koordenadór Asuntus Ekonómikus, Joaquim Amaral, Ministru Finansas, Rui Gomes, Ministru Turizmu, Komérsiu no Indústria, José Lucas do Carmo da Silva, Vise-Ministru Komérsiu no Indústria Domingos Lopes Antunes no Sekretáriu Estadu Formasaun Profisionál no Empregu, Alarico do Rosário. Partsipa mos iha reuniaun nee pesoal eminente balun hanesan eis Prezidente Republika Timor Leste, José Ramos Horta no eis Primeiru Ministru Timor Leste, Estanislau da Conceição Aleixo Maria da Silva.

Faze tuir mai

Prezidente  Grupu  Traballu konvida pais membru  interesadus sira hodi halo negosiasaun bilaterais kona-ba asesu  merkadu nian hodi  manifesta sira nian interese antes  fulan ikus setembru nian. Husu mos  Timor-Leste kontinua  atualiza Planu Asaun kona-ba  Lejislativu nian hodi  submete tradusaun husi projetu  lejislasaun hirak ne’ebé  adoptada husi OMK,  fornese mos Tabela Apoiu  Agrikultura  antes  reuniaun Grupo Traballu tuir mai. Membru sira mos konkorda hodi  eksplora  posibilidade publikasaun “Elementus husi relatório Grupu  Traballu nian” nu’udar passu  progresu  ne’ebé feitu iha  prosesu  adezaun nian. Konforme ba disponibilidade kona-ba dokumentasaun  nian, Grupo  Traballu  bele  realiza  reuniaun faze datoluk iha  inísiu  tinan 2022. (KI)

No More Posts Available.

No more pages to load.