Tenke Investe Iha Setór Produtivu

by -770 views
Padre Julio Crispin

DILI (Timor Post)—Padre Julio Crispin husu governu tenke investe maka’as iha setór produtivu sira para bele fó retornu ba estadu.

Tuir nia, governu presiza iha planu ne’ebé produtivu, la’ós planu ne’ebé konstrutivu demais tanba durante tinan 20 nia laran, Governu halo planu no projetu sira ne’ebé mak gasta osan barak, maibé ninia retornu uitoan.

“Iha retornu lubuk boot ida husi non-finanseiru ita sente, maibé ba oin ne’e ita labele hela de’it ho retornu sosiál ka retornu sira seluk, maibé ita mós presiza retornu finanseiru, entaun Governu presiza ona investe iha setór produtivu sira, atu bele fó retornu finanseiru ba ita, tanba retornu finanseiru ne’e mai husi setór produtivu sira, liuliu setór ne’ebé bele fó fila osan ba kofre Estadu tinan-tinan,” Padre Julio informa ba Timor Post, Segunda (30/08).

Padre Julio, husu ba governu tuir mai ne’e presiza tau ona atensaun maka’as ba setór produtivu sira, tanba setór produtivu fó kbiit no biban ba setór kooperativa no setór industrial, para bele fó fali retornu ba kofre Estadu.

“Estadu hasai osan barak, maibé osan la tama fila-fali, tinan sanulu tuir mak osan mina nian laiha ona, fundu petrolíferu mak komesa monu, oinsá mak ita bele sustenta no aguenta  ita-nia ekonomia nasionál, entaun dalan ne’ebé importante mak tenke investe iha setór produtivu sira, mezmu ke oitu-an, maibé tenke hahú”, Padre Julio afirma.

Nia hatete, Timor-Leste iha ona rekursu umanu kona-ba peska nian, maibé Governu haruka fali ema husi nasaun seluk mak mai kaer fali ikan iha Timor.

“Ita nia area peska ne’e hale’u Timor, nusa mak ikan sira ne’e ita haruka ema husi li’ur mak mai kaer, nusa mak ita la dezenvolve ita nia setór peska, hodi nune’e bele aumenta ita nia reseita. Ita iha ona rekursu umanu atu bele kaer ikan, halo konjelamentu no esporta, ita iha dalan maibé la hatene saida mak ita-nia Governu nunka hanoin atu dezenvolve,” Padre Julio preokupa.

Padre Julio admite, Ministériu Agrikultura no Peska harii tinan hira ona, maibé kestaun mak orsamentu ne’ebé alokadu ba ministériu refere persentajen  ki’ikoan loos, entaun labele dezenvolve duni.

“Ita hakarak atu dezenvolve, ita tenke hasa’e osan ba fatór produtivu sira ne’e, para bele produs osan ruma ba ita nia-rain,” nia sujere. (jry)

No More Posts Available.

No more pages to load.