Tempu Ona Hadi’a Povu nia Moris

by -175 views

Timor Post (08/12/2020)-Sekretáriu Jerál Partidu FRETILIN lakohi atu oitavu  governu Konstitusionál ne’ebe lidera hosi Primeiru Ministru Taur Matan Ruak monu, tanba tempu ona atu hadi’a povu nia moris.

“Lakohi atu governu ida monu no tempu ona atu bele hadi’a povu nia moris,” Alkatiri subliña iha semináriu ho tema “Invazaun iha Timor-Leste hosi Indonézia iha tinan 1975 hanesan Dezafiu, hodi hanoin hikas memoria 7 dezembru, ne’ebé organiza hosi Juventude FRETILIN, iha salaun Comite Central FRETILIN (CCF), Comoro, Dili, Segunda (07/12).

Nia dehan, liu tiha tinan 18 restaurasaun independénsia,  hanoin sentidu luta libertasaun ba povu agora atu haburas fali ona, atu haburas ne’e tenke hahú hosi edukasaun, hadi’a sistema saúde no  tenke muda konseitu dezenvolvimentu.

Tenke iha polítika dezenvolvimentu ida-ne’ebé bele muda povu nia moris loro-loron nian, ne’e mak atu akontese agora, tan ne’e mak FRETILIN lakohi husik VIll Governu atu monu.

Eis Primeiru Ministru ne’e husu partidu políitiku sira tenke rekoñese hodi hakru’uk ba realidade.

Sekretáriu Jerál FRETILIN ko’alia asuntu ne’e tanba situasaun inserteza polítiku halo governu deside retira proposta OJE 2020 ho montante biliaun $1.995 iha loron 3 dezembru 2019 (faze jeneralidade loron daruak), tanba la estruturadu no inskonstitusionál, ne’ebé kestiona rasik hosi bankada Governu nian.

Nia dehan, governu kumpre rekomendasaun PN nian hodi reduss ba biliaun $1,668. Proposta ne’e governu aprezenta hikas ba PN iha loron 19 dezembru 2019 no PN hahu debate maibé iha loron ikus faze espesialidade orsamentu 2020 ho montante biliaun $1,668 ne’e la pasa ho rezultadu votasaun a-favór 13, kontra 15 no abstesaun 25.

Ho orsamentu ne’ebé pasa halo Prezidente Repúblika Francisco Guterres “Lú Olo’ deside bolu partidu asentu parlamentár sira atu fó solusaun ba inserteza polítika ne’e.

Partidu neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu (22/2/2020), iha sede CNRT, Bairro dos Grilhos, Dili. Akta ne’e asina hosi Prezidente CNRT Kay Rala Xanana Gusmão, Prezidente Partidu Demokrátiku (PD) Mariano Assanami Sabino, Prezidente KHUNTO Armanda Berta dos Santos, Prezidente Ein-Ezersísiu UDT Rodolfo Aparício Guterres, Prezidente Ein-Ezersísiu Frente-Mudansa (FM) Egídio de Jesus no Prezidente PUDD António de Sá Benevides.(Jornalista : Julio Salinas Soares)

No More Posts Available.

No more pages to load.