Tempu Badak Reativa Inspesaun ba Ligasaun Ahi Ilegál

by -35 views
Foto Google

DILI (Timor Post)—Durante aplika konfinamentu obrigatóriu iha kapitál Dili relasiona ho pandemia Covid-19, Eletrisidade de Timor-Leste, empreza publika (EDTL.ep), mós suspende sira nia atividade inspesaun, maibé iha tempu badak servisu inspesaun sei reativa hikas.

Presidente Konsellu Administrasaun EDTL.ep, Paulo da Silva, informa iha tempu besik reativa fali inspesaun ba liña ilegál sira.

“Agora daudaun ne’e prepara hela, ita sei konsentra ba servisu seluk mais reativa fali ekipa inspesaun konsumidor hotu, atu nune’e bele deteta ligasaun ilegál sira,” informa Paulo ba Timor Post iha Ministeriu Finansas, Sesta (30/07).

Kona-ba atu halo ligasaun foun, nia dehan, seidauk iha kontador hodi responde ba inspesaun komunidade sira ne’ebé ligasaun foun, maski nune’e ekipa kontinua hala’o inspesaun ba konsumidor sira ne’ebé dada liña ilegál.

Daudaun ne’e, kontratu lori ona ba tribunal atu hetan vistu para kompania bele supply ona kontador hodi fornese no monta ba liña foun no illegal sira.

Portantu, iha orsamentu millaun lima ba kontador hamutuk 120 mill hodi monta ba ligasaun foun inklui ligasaun ilegál sira ne’ebé deteta.

Nune’e mós ba konsumidor sira ne’ebé iha kontador maibé sei kontinua dada illegal kuandu deteta sei iha multa ka sansaun administrative ba sira ne’ebé komete iregularidade sira ne’e.(jho)

No More Posts Available.

No more pages to load.