TDD La-halo Julgamentu durante Serka Sanitária

husi -277 views

Timor Post (10/03/2021)-Liga ba implementasaun serka sanitária iha sidade Dili, Tribunál Distritál Dili (TDD), hahú tersa (09/3), hapara temporária atividade julgamentu.

Tuir observasaun Jornalista Timor Post, iha Tribunál Distritál Dili, horisehik, iha oras tuku 9:50, bainhira Jornalista hakat tama área TDD, iha karreta prizaun ida akompaña husi guarda Prizioneiru na’in 4, akompaña mós Polísia sai husi areadores TDD ba estrada públiku hori lori+ fila Prizionéiru ida ba Prizaun Bekora.

Bainhira jornalista tama odamatan boot TDD, fatin vizitante sira nian ne’ebé loron baibain ema tuur Nakonu, inklui sala julgamentu sira TDD balu Odamatan Nakloke, balu taka hela maibé mamuk hotu laiha movimentasaun iha TDD.

Iha Pesoál Seguransa sivíl no membru PNTL balun ne’ebé destakadu iha TDD sira hala’o servisu hanesan baibain nune’e mós ofisial Justisa, Prokuradór balu husi Ministériu Públiku, inklui Juis balu de’it maka tuur iha fatin ne’ebá hodi halo komparasaun situasaun atuál.

Maski Juis balu, Ofisial Justisa, funsionarius no parte seguransa nian tama servisu maibé la-halo prosesu Julgamentu.

Tuir informasaun ne’ebé jornalista hetan hosi Juis ida iha Tribunál katak atividade julgamentu iha Tribunal para temporariamente tanba liga ho desizaun serka sanitaria ne’ebé governu hasai ona.

“Alin agora ne’e ita nia situasaun grave uitoan, ne’ebé la hala’o Atividade Julgamentu,” hatete juis ida bainhira hetan jornalista hamriik hela iha sala servisu fatin Tribunál nian.

Entretantu, iha Tribunál Rekursu, maski desizaun governu nian deside ona serka sanitária iha munisípiu Dili maibé funsionáriu hotu iha instituisaun ida ne’e kontinua servisu hanesan baibain.

Bainhira jornalista hakat tama sala vizita TR, pesoál Seguransa Sivíl ho funsionáriu públiku na’in ida tuur hela iha sala oin, Pesoál Seguransa Sivíl Feto ida hakat besik ba jornalista Timor Post, lori kedas fasilidade testu isin manas nian ho Alkol fase liman nian.

Nune’e Seguransa husu jornalista Lolo liman hodi nune’e sira rega kedas Alcohol fase liman, no mós koko jornalista ho mákina “termu Scanner” testu Isin manas nian iha rentos.

Hafoin ne’e Fonte Seguransa Sivíl ne’ebé la temi ninia Identidade ne’e husu “ita presiza se?, maibé jornalista hatán, lae ha’u atu halo observasaun ba servisu Tribunál Rekursu nian iha implementasaun Serka Sanitária loron ne’e servisu la’o ka paradu?”.

Hafoin ida ne’e Timor Post husu Seguransa Sivíl katak, “ha’u haree Prezidente Tribunál Rekursu nia karreta tama Juis Tribunál nia Karreta iha hotu entaun servisu la’o normal?, nune’e Seguransa ne’e hatán sin servisu la’o normal hela,”.

Entretantu, observasaun iha edifísiu Ministériu Públiku, Prokuradoria Jerál Repúblika Kolmera, iha oras 11:18, too iha resintu PJR haree Karreta PJR ho nia eskoltu para hela, nune’e mós funsionáriu sira servisu hanesan loron baibain, inklui haree ema balu la’o tama sai husi Portaun Entrada edifísiu Ministériu Públiku hodi hato’o keixa.(f10)