Taxa Aumenta Sa’e, Povu Mak Vítima

by -713 views
Negosiante no Emprezariu nain ba loja Nini Jero, Lorenco Caunan, Imajen TP/ Mariano Abi

(Reportajen Estaziadu Mariano Abi/Asistente Editor Hermenegildo da Costa Tilman)

RAEOA (Timor Post)—Situasaun ekonomia iha rai laran loron ba loron nia folin aumenta sa’e, halo konsumidór no kbiit laek sira preokupa tebes ho nesesidade moris nian, ne’ebé mak agora daudaun sai problema.

Negosiante no mós emprezáriu loja Nini Jero, Lourenço Caunan, iha Aldeia Sanane, Suku Kosta, Postu Administrativu Pante Makasar, Rejiaun Administrativu Espesiál Oekusi Ambenu (RAEOA), relasiona ho agora daudauk nasaun enfrenta sasán folin sa’e, nune’e nia hatete katak, agora VIII Governu ninia lala’ok, kuandu taxa sa’e ba beibeik, la’ós emprezáriu mak sai vítima, maibé povu kiik sira.

“Iha ne’ebé mak emprezáriu ida nia hakarak fa’an sasán atu lakon, “korban masyarakat”, sei taxa sa’e beibeik, la’ós emprezáriu mak sai vítima, ne’e laiha. Iha mundu ne’e emprezáriu la sai vítima, so vítima mak ita nia populasaun ou ita nia povu,” nia dehan ba Jornalista Timor Post Online iha ninia fatin, aldeia Sanane (Cabang Kabuka), Kinta (28/04).

Emprezáriu ne’e hatete, se sasán nafatin folin sa’e, la afeta ba emprezáriu, tanba knar emprezáriu ne’e buka lukru, iha ne’ebé de’it sempre buka lukru, komún idade kbiit laek ka povu mak nafatin sai vitima.

“Ami hanesan emprezáriu ne’e laiha, ami foti iha Agent husi Dili hanesan ne’e ona, yang jelas ami tenke tau tan 25 centavos ou 50 centavos. Sei ami la tau tan 25 centavos ou 50 centavos, oinsá ami selu ami nia traballadór sira, ense mina ba karreta no kada fulan selu tan taxa, ne’ebé agora hanesan ne’e afeta ba ita nu’udar sidadaun Timor Leste atu hetan osan uitoan mós susar tebes, nune’e mós inflasaun sa’e beibeik, ho ida ne’e ita nafatin  hakdasak”. Nia dehan

Emprezáriu Nini Jero hatutan, hanesan emprezáriu nia funsaun primeiru mak buka lukru aumenta lukru, karik sasán la iha ami ba agen iha Dili sosa, ami la’ós naranaran hasa’e folin, maibé hahú kedan husi Agent ida ne’ebé mak ami foti iha ne’ebá sa’e ona, entaun ami mós tenke aumenta hodi manan netik 0,25 Centavos balu” nia relata.

“Agora daudaun problema boot mak Mina ba konsumu hanesan Bimoli, folin aumenta sa’e no iha agent balu mós la iha ona, karik Ro atu halo movimentu fali mós ba foti tan la lori mina goreng ona, tanba iha kapitál Dili ne’e Agent hotu-hotu mina laiha ona”. Nia afirma

Nia afirma, agora daudauk foos mós folin sa’e, folin foos modelu Manu Vitoria 20k uluk ha’u fan saku ida dolar amerikanu 11,50 Centavos, no 25k dolar amerikanu 12,50 Centavos, maibé agora lae 20 Kg ho nia  folin dolar amerikanu 20k 12.50 no 25k dolar amerikanu  15 ida ne’e stock sei bazeia hela ba stock uluk nian.

Ho situasaun ne’ebé mak agora daudaun nasaun enfrenta krize boot, hanesan emprezáriu no sidadaun Timor oan husu ba órgaun kompetente parte governu nian, atu haree ba situasaun folin sasán nian ne’ebé mak agora daudauk akontese iha ita nia rai laran hodi la fó impaktu no difikuldade ba povu kbiit laek sira nia moris. (Lee Notísias Seluk Iha Jornál Timor Post/ Asesu You Tube Timor Post)

No More Posts Available.

No more pages to load.