Taur Preokupa Ma-Nutrisaun iha Timor

by -428 views
Imajen ne’e hatudu Serimónia lansamentu prémiu ma-nutrisaun iha Salaun Cyty 8, Manleuana, Segunda (09/08/2021).

Jornalista Jaime Pires / Noémio Falcão

DILI (Timor Post)—Primeiru Ministru Taur Matan Ruak preokupa tebes ho problema ma-nutrisaun iha Timor Leste. Eis Gerileiru ne’e kompara situasaun ne’e pior liu fali tempu okupasaun.

“Ha’u hanesan Eis militár ha’u preokupa tanba, kuandu hanesan Komadante ka Jeneral, forsa mak ema,” Taur subliña iha nia diskursu hafoin lansamentu prémiu ma-nutrisaun iha Salaun Cyty 8, Manleuana, Segunda (09/08/2021).

Nia aumenta, tanba ne’e ita bele iha kilat iha kainaun maibé ema kuandu fraku ka ma-nutrisaun sa’e foho labele.

“Ha’u uluk hanesan Prezidente Repúblika ha’u la’o vizita suku hamutuk 442 iha territóriu laran tomak, ha’u haree ita nia inan feto sira no ita nia inan aman sira barak mak krekas,” dehan Nia.

Nia aumenta, “ha’u haree ha’u hanoin loos, ha’u uluk iha ai laran ha’u nunka haree soldadu sira krekas hanesan ne’e, entaun perguntas mosu tanba saida ukun an ona kontinua hanesan ne’e, serake hahán mak laiha sira la han ka tanba saida”, Nia tenik.

Tanba ne’e nia hanoin hodi kontinua fó nia kontribuisaun ba problema ida ne’e hodi bele hamenus ka halakon ma Nutrisaun iha Timor-Leste.

Xefe Governu ne’e mós fó nia agradesementu boot tebes ba parseiru sira ne’ebé mak durante ne’e servisu maka’as ba luta hodi hamenus ma Nutrisaun iha Timor-Leste.

“Ha’u nia agradesementu, ba parseiru sira hanesan, UNICEF, WHO, WFP, FAO no sira seluk tan ne’ebé mak durante ne’e servisu maka’as ba kontribuisaun hodi hamenus ma Nutrisaun iha Timor-Leste”, tenik Nia.

Nia aumenta, tanba ne’e sei sai hanesan problema boot ida ba governu hodi servisu maka’as ba problema ida ne’e, tanba Timor-Leste sei sai númeru dahuluk mak Nutrisaun iha rejiaun Aziatiku ninia.

No More Posts Available.

No more pages to load.