Taur Preokupa Fatin ba Manutensaun Ró, Apela Kooperasaun Alemaña

by -362 views
Primeiru Ministru Taur Matan Ruak

Jornalista Jaime Pires / Editór Noémio Falcão

Dili (Timor Post)—Primeiru Ministru Taur Matan Ruak hafoin inaugura Ró Berlin Ramelau ne’ebé fábrika ho apoiu orsamentu husi Governu Alemaña ho Timor Leste, preokupa fatin ba manutensaun. Nune’e, xefe governu apela kooperasaun husi nasaun ne’e liuliu infrastrutura.

Liuhusi diskursu iha serimónia inaugurasaun, Segunda (20/12/2021) iha Portu Dili, Taur subliña, tinan barak ona maka governu seidauk prepara fatin ba manutensaun ró no kada tinan tenke gasta osan no tempu barak lori ró ba halo manutensaun iha Indonézia.

“Tinan barak ona maibé ita laiha fatin ba halo manutensaun ba Ró, tanba Ró rua ne’ebé mak governu Alemaña apoiu ba Timor-Leste ne’e di’ak no kapás maibé la justifika tinan-tinan tenke haruka ba Indonézia hodi halo manutensaun,” Taur preokupa.

“Tanba ne’e mak hanesan primeiru ministru hakarak apela ba kooperasaun Alemaña Timor-Leste diaponivel atu halo parseria ba konstrusaun infraestrutura ba ró sira,” Taur hatutan.

Dadaun ne’e Timor-Leste iha ró rasik hamutuk ho kiikoan sira kuaze sanulu resin inklui ho ró polísia marítima nia no forsa naval nian.

“Ró sira ne’e ita haruka tinan-tinan ba Indonézia, ita lakon rekursu, lakon tempu, tanba ne’e ha’u apela governu Alemaña konsidera ida ne’e, sebele reforsa parseria ida ne’e iha area marítima kompleta ho infraestrutura manutensaun ba ro ninian, ha’u fiar nia kursu sei la liu ró sira ne’ebé mak ita sosa, dalaruma menus tan,” Taur hatete.

Iha serimonia inagurasaun ne’e, hetan partisipasaun másimu husi orgaun soberanu inklui Prezidente Parlamentu, deputadu sira, membru  governu, tribunal reprezentante husi igreja partisipa husi Arsebispu Arkidioseze Metropolitanu Dili, Don Virgílio do Carmo da Silva, Primiadu Nobel da Paz, José Ramos Horta.

No More Posts Available.

No more pages to load.