Taur Matan Ruak: “Dezenvolvimentu Paradu Tanba Moras Ne’e”

husi -24 views

Timor Post (17/03/2021)—Primeiru Ministru Taur Matan Ruak fó resposta ba preokupasaun sira kona-ba governu atuál sempre defende katak osan iha maibé tanba-sa maka dezenvolvimentu paradu.

Taur dehan, dezenvolvimentu rai laran paradu tanba moras daet COVID-19.

“Dezenvolvimentu paradu ne’e tanba moras ne’e. Tanba ita boot haree iha ne’ebé maka governu ida tau tia osan pois nia dukur toba fali, laiha,” Taur subliña ba Jornalista sira hafoin reuniaun ho Prezidente Repúblika Francisco Guterres Lú Olo, iha Palásiu Prezidensial, Bairro-Pite, Dili, ohin.

Taur dehan, governu ida ne’e hakarak oinsá maka ezekuta nia orsamentu, hala’o dezenvolvimentu, presta servisu ba nia sidadaun sira.

“Infelizmente la’ós paradu totalmente, ita limita buat balun tanba moras ne’e. I ha’u fi’ar katak situasaun ne’e sei ultrapasa,” Taur hatutan.

Nia konsidera moras COVID-19 hanesan pasajeiru. “Ne’e la’ós ita maka hakarak. Ita rejista tiha ona kuaze tinan ida no to’o ohin, inkuantu nasaun sira seluk hakoi tiha ona mate lubuk ona. Nebe garasas a deus ita nia nasaun ne’e abensuadu. Só ke iha ita nia rai iha mos Tome (São Tome). Kuandu Jesus kanek Tome la fiar, para fi’ar nia tenke hatama liman iha Jesus nia kanek,” Xefe Governu ne’e komenta. (cao)