Taur Manda Karta Agradesimentu ba Élia no Foti Bonifácio Maucoli ba Ministru Saúde Interinu

by -296 views

DILI—Primeiru Ministru Taur Matan Ruak manda ona karta agradesimentu ba Eis Ministra Saúde Interina no Vise Ministra ba Kuidadu Saúde Primária, Élia Antonia dos Reis Amaral no foti hikas atuál Vise Ministru Saúde ba Dezenvolvimentu Estratéjiku Saúde, Bonifácio Maucoli dos Reis ba Ministru Saúde Interinu.

Ba Élia, Taur hato’o agradesimentu ba prestasaun servisu tomak ba Estadu no dezempeñu sira durante hala’o funsaun iha nia governasaun.

“Ha’u espresa ha’u nia agradesimentu ba servisu tomak ne’ebé durante ne’e hala’o no votus sussesu ba etapa foun iha vida professional ne’ebé agora inisia,” Taur subliña iha karta agradesimentu ba Eis Ministra Kuidadu Saúde Primária, Élia Antonia dos Reis Amaral, iha loron 03/04/2020, ne’ebé Timor Post asesu iha loron 07/04/2020.

Entretantu antes ne’e Taur Matan Ruak hatete, nia lakohi servisu hamutuk ho Élia iha nia governasaun. Tanba ne’e, iha prosesu ezonerasaun no aseita ona husi Prezidente Repúblika Francisco Guterres Lú Olo iha loron Sexta (03/04/2020).

“Ha’u lakohi atu servisu hamutuk ho nia. Pontu final,” Taur subliña ba Jornalista sira hafoin enkontru ho ekipa jestaun krize iha Sentru Konvensaun Dili (CCD), Segunda (06/04/2020).

Taur la esplika klaru iha ka la’e karta koñesimentu kona-ba desizaun ezonerasaun ba Élia, maibé dehan de’it, prezidente repúblika dekreta tiha ona karta ezonerasaun.

“Ha’u la hatene, ita boot (Jornalista) de’it  mós hatene tiha ona halo nusa mak nia (Élia) labele hatene,” Taur hatete.

Hamihis Feto Timor Leste

Entretantu Prezidente Rede Feto, Judite Dias Ximenes afirma, demisaun Dra. Élia Antonia dos Reis Amaral husi Vise Ministra ba Kuidadu Saúde Primária husi governu daualu, hamihis tebes feto Timor Leste seluk atu asumi kargu sira lideransa.

Liuhusi komunikadu ba imprensa ne’ebé Timor Post asesu, Segunda (06/04/2020), ne’ebé asina husi Judite Dias Ximenes subliña, demisaun ba Dra. Élia ne’e imidiatamente, hamihis tebes feto timoroan sira no la motiva feto sira seluk.

Iha komunikadu ne’e mós nota Komisaun Interministeriál ba Kolaborasaun ba Prevensaun no Kontrolu COVID-19 la sólidu bainhira halo demisaun ba Dra. Élia Amaral hanesan Ministra Interina ba Saúde iha momentu ne´ebé Komisaun ne´e tenke hamutuk hodi hasoru inimigu COVID-19.

Entretantu iha loron 3/04/3030, Primeiru Ministru Taur Matan Ruak aprejenta pedidu ezonerasaun Élia Antonia dos Reis Amaral husi kargu Vise Ministra ba Kuidadu Saúde Primária ba Prezidente Repúblika Francisco Guterres Lú Olo no hetan aseitasaun kedas iha oras hirak tuir mai hafoin simu pedidu ne’e. (cao)

No More Posts Available.

No more pages to load.