Taur Husu KNDJ Integra Joven Iha Prosesu Dezenvolvimentu

by -115 views

Timor Post (16/11/2020)— Primeiru Ministru, Taur Matan Ruak, husu Konsellu Nasionál Dezenvolvimentu Juventude (KNDJ) atu halo esforsu hodi integra juventude sira iha prosesu dezenvolvimentu nasionál.

Xefe Governu, hato’o lia hirak ne’e, hafoin fó tomada de posse ba membru na’in 17 iha salaun Ministériu Finansas Aitarak Laran, Segunda (16/11) lokraik ne’e.

Matan Ruak deklara, KNDJ estabelese ho Dekretu-Lei N.°27/2016, 31 de Agostu, hodi define natureza órgaun juventude, tanba KNDJ hanesan órgaun akonsellamentu atu buka koordena ho  instituisaun públiku no privadu sira atu buka integra joven sira iha prosesu dezenvolvimentu nasionál.

Xefe Governu hatutan, tomada de posse ida-ne’e, marka tan dala ida husi esforsu governu anteriór sira-nian atu enkuádra foin sa’e sira ba prosesu dezenvolvimentu nasionál.

“Iha dekretu-lei N.°27/2016, 31 de Agostu, ne’e difini natureza órgaun juventude KNDJ hanesan órgaun akonsellamentu no koordenasaun esforsu instituisaun públiku no privadas sira-nian, par oinsá buka dalan buka oportunidade integra joven sira iha laran ba prosesu dezenvolvimentu”, dehan Taur Matan Ruak, iha diskursu hafoin fó posse ba membru KNDJ na’in 17 iha Ministériu Finansas, Dili.

Primeiru Ministru rekoñese, servisu ida-ne’e la’ós kaman, tanba, sei halo estudu atu identifika dezafiu no difikulta juventude sira-nian, atu integra iha prosesu dezenvolvimentu nasionál.

“Ne’e la’ós servisu kaman ne’e todan, ida seluk maka buka oportunidade, identifika oportunidade, iha ita-nia rain setór privadu ho setór sira seluk dezenvolvimentu nian ké presiza joven sira tama, presiza kontribuisaun joven sira-nian,” hateten PM Taur.

Tanba ne’e PM Taur dehan, KNDJ sei halo koordenasaun ho instituisaun públiku no privadu sira, no mós sosiedade sivíl, nune’e kontribui eskuadra foin sa’e sira ba oportunidade ne’ebé nasaun iha.

PM Taur promete, sei akompaña nafatin servisu KNDJ nian, maski KNDJ ne’e tutela iha Sekretáriu Estadu Juventude Desportu (SEJD).

Iha fatin hanesan, Sekretáriu Estadu Juventude Desportu, Abrão Saldanha “Nokosiku” reforsa, problema atuál ne’ebé juventude sira hasoru maka kampu servisu inklui formasaun vokasionál.

“Agora daudauk ita hatene problema boot joven nian maka empregu, formasaun abilidade joven sira-nian, oinsá mak konsellu sira reúne buka estratéjia intervensaun iha liña ministériu hotu la’ós SEJD mak sei toma konta, joven iha agrikultura, joven iha komérsiu, joven iha turizmu, joven iha siénsia teknolojia iha área oi-oin ita bele buka planu integradu ida,” dehan Sekretáriu Estadu, Abrão Saldanha.

Governante ne’e hatutan, mandatu prinsipál ne’ebé KNDJ sei halo maka uluk maka, harii planu asaun nasionál integradu ba joven sira.

“Depois kuandu planu ne’e iha ona maka konsellu ne’e sei kordena nia implementasaun, monitoriza hamutuk ho organizasoens juventude sira atu tau matan ba joven sira,” informa nia.

Nia hatutan tan, estudu ne’ebé KNDJ sei halo ne’e, sei rekomenda ba governu, nune’e integra iha planeamentu integrada ba assuntus dezenvolvimentu juventude nian.

Tuir Dekretu-Lei N.°27/2016, 31 de Agostu, aprova polítika nasionál ba juventude no define temátiku 5 no mós medidas intervensaun ne’ebé presiza governu tau atensaun.

Manda ba membru KNDJ na’in 17 ne’e, durante tinan 4, no membru KNDJ ne’e mai husi liña ministériu.(Jornalista: Jaime Pires)

No More Posts Available.

No more pages to load.