Taur Hakarak Monta fali F-FDTL iha Fronteira ho Indonézia

by -1.759 views
Taur Matan Ruak

Jornalista Jaime Pires / Editór Noémio Falcão

DILI (Timor Post)—Primeiru Ministru nu’udar mos Ministru Defeza, Taur Matan Ruak promete, iha nia mandatu rohan haruka FALINTIL-Forsa Defeza Timor Leste (F-FDTL) mak ba halo seguransa iha fronteira rai ho Repúblika Indonézia.

Taur la esplika klaru kona-ba oinsá ho Unidade Patrullamentu Fronteira (UPM) nu’udar unidade ida husi Polísia Nasionál Timor Leste (PNTL), maibé subliña de’it, loloos tuir nasoens unidas nia hakarak F-FDTL uluk kedas monta ona iha fronteira.

“Uluk ha’u sei iha Jeneral tempu ho nasoens unidas nian, sira husu atu forsa armada mak ba maibé ha’u hatete labele, tanba ema sira ne’ebé mak iha forsa armada ne’e sira foin funu hotu mak mai  entaun tauk provoka malu iha ne’ebá, tiru malu. Tanba ne’e mak ha’u husu nasoens unidas tau polísia,” Taur haktuir iha nia intervensaun bainhira aprejenta rajaun sira ba estensaun estadu emerjénsia ba-dala 17, iha Uma Fukun Parlamentu Nasionál, Tersa (24/08/2021).

Xefe Governu ne’e dehan, problema ne’ebé enfrenta iha fronteira ne’e maioria mak krime organizada, tanba ne’e mak foin dadaun nia parte orientá ona hodi kaer veteranu no membru polísia sira balun.

“Se la’ós tinan ida ne’e, tinan oin tanba ha’u hakarak antes ha’u nia mandatu remata forsa armada mak iha ona fronteira,” Taur afirma.

No More Posts Available.

No more pages to load.