Taur fó Posse ba Komisaun Terras Propriedade Na’in-11

by -400 views
Primeiru Ministru Taur Matan Ruak foto hamutuk ho emposadu sira. Foto TP: Jaime Pires

Jornalista Jaime Pires / Editór Noémio Falcão

Dili (Timor Post)—Primeiru Ministru (PM), Taur Matan Ruak fó Pose ba Komisaun Terras Propriedade hamutuk na’in-11, iha Palásiu Governu, Dili, Sesta (19/11/2021).

Iha diskursu, Taur subliña, lei fó poder ba emposadu sira hodi foti desizaun kona-ba kazu disputa ba direitu propriedade sira nian, maibé tenke ho responsabilidade.

Foto TP: Jaime Pires

“Poder ne’e la’ós direitu ida ne’ebé atribui ba imi, maibé importante liu poder ne’e nu’udar responsabilidade ida ba ita boot sira,” dehan Nia.

Taur husu ema hotu atu hala’o kna’ar ho laran no étika profisional ne’ebé aas ho forma independente hodi uza koñesementu jurídiku no tékniku.

“Ha’u fó hanoin ba komisáriu katak ita boot sira tenke hanoin nafatin katak, imi nia knaar sira imi dezenpeña ba interese públiku ne’ebé aas liu,” Taur hatutan.

Iha sorin seluk, Prezidente Komisaun das Terras, Pasqual da Costa Soares hatete, servisu ne’ebé mak sira simu ne’e todan tebes, maibé dahuluk sira sei hahú ho sira nia rejimentu interna hodi gia ekipa ne’e atu halo servisu.

“Oinsá atu bele establese   final arbitrajen  no oinsá atu distribui kazu sira ne’e ba Komisariu sira hodi rezolve kazu ba disputa rai ne’e”, dehan Nia.

Nia aumenta, durante ne’e kazu disputa rai barak, maibé agora sira simu responsabilidade ida ne’e hodi rezolve kazu sira ne’e hotu iha teritoriu nasionál tomak.

Tuir mai Lista na’in (11) membru Komisaun das Terras no suplente nain rua ne’ebé mak simu pose mak hanesan: Pascoal da Costa Soares, (Prezidente KomisaunTerras) Romao Guterres, (membru); Francisco Ribeiro Borges Guterres (membru); Iulio Mota Nhew (membru); Belmira Fernanda Scares, (membru); Sidalia Henrique Rodrigues (membru); Sérgio Manehat (membru); José Carlos Da Cruz Gomes (membru); Emilio Pereira de Jesus sarmento (membru); Abrao da Silva (Suplente) no Filipe Rodrigues [Suplente).

No More Posts Available.

No more pages to load.