Tauk Hakbesik-an ba FS, Kelikai Mate Naba-Naba

by -464 views
Koordenadór Pilar-7, Sentru Integradu Jestaun Krize, Nilton do Carmo

DILI (Timor Post)—Tuir relatóriu hosi Sentru Integradu Jestaun Krize (SIJK) identifika katak, sidadaun mate naban-naban iha Munisípiu Baukau Postu Administrativu Kelikai kauza tanba sidadaun sira ta’uk hakbesik-an ba fasilidade saúde (FS), la’ós hosi Covid-19.

Koordenadór Pilar-7, Sentru Integradu Jestaun Krize, Nilton do Carmo, hatete bazeia ba estudu hosi ekipa vijilánsia epidemolojia, deskobre katak, sidadaun na’in-54 ne’ebé mak mate iha Kelikai, la’ós tanba COVID, maibé kauza tanba ta’uk hakbesik ba fasilidade saúde hodi halo tratamentu.

“Hosi ema na’in-54 ne’ebé mak mate iha ne’ebá, ita konsege halo duni trashing ba ema na’in-100, sample ne’ebé mak ita foti hosi família relevante, ita só hetan de’it ema na’in-neen mak pozitivu. Entaun bazeia ba estudu ne’ebé mak kolega sira halo, hatudu katak maluk sira ne’e mate la’ós tanba COVID, maibé mate tanba sira ta’uk ba iha fasilidade saúde, sira barak mak ho idade ne’ebé mak hitunulu, ta’uk lori ba fasilidade saúde atu hetan swab”, Nilton fó sai dadus ne’e iha Parlamentu Nasionál, ámbitu debate estensaun EE da-18, Tersa (28/09).

Nilton dehan, situasaun atuál Covid-19 iha Timor-Leste, kazu konfirmadu iha pasiente rihun 19, hosi númeru ne’e, hirak ne’ebé mak sei halo hela tratamentu hanesan pasiente ho Covid-19 hamutuk 920, no 113 mak obitu. No taxa vasinasaun iha mudansa, maibé Munisípiu Aileu, Ermera no Ainaru, persentajen vasina sei ki’ik.

“Husu na’i-Deputadu sira nia tulun, atu bele ita hasa’e kobertura vasina ba iha ita-nia maluk sira”, Nilton afirma.

Entretantu, antes ne’e Ministru Prezidénsia Konsellu Ministru, Fidelis Leite Magalhães, hatete Governu akompaña hela dezenvolvimentu evolusaun situasaun iha Kelikai.

“Governu akompaña dezenvolvimentu evolusaun ba situasaun iha Kelikai, iha unidade vijilánsia epidemolojia nian, hosi Ministériu Saúde, ne’ebé mak halo sira-nia servisu iha Kelikai”, Fidelis dehan.

Fidelis promete, sei hato’o informasaun ba públiku, bainhira simu relatóriu investigasaun final hosi unidade vijilánsia epidemolojia. (jry)

No More Posts Available.

No more pages to load.