Tanba Lú Olo nia Orientasaun, Xanana husu atu Pronunsia Destinu Koligasaun Foun

husi -60 views

DILI—Primeiru Ministru Indijitadu ba Governu Dasia, Kayrala Xanana Gusmão husu ba Prezidente Repúblika Francisco Guterres Lú Olo atu pronunsia ba destinu koligasaun foun ne’ebé forma husi Partidu CNRT, PD, KHUNTO, UDT, FM no PUDD.

Porta-Vóz Koligasaun Foun António da Conceição alias Kalohan, offisialmente lori ona karta ho kontiudu refere, ne’ebé kompleta ho bandeira husi partidu neen ne’e, ba entrega iha gabinete Prezidénsia Repúblika, iha loron Sesta (15/05/2020).

 

“Bazeia ba orientasaun prezidente koligasaun no ha’u hanesan porta-vóz ba entrega fali karta id aba Prezidente Repúblika. Kontiudu karta husu de’it Prezidente Repúblika bele ko’alia netik buat rum aka halo netik pronunsiamentu ba koligasaun foun ne’e, sei iha ka laiha ona” Kalohan ba Jornalista sira hafoin fila husi Palásiu Prezidensial.

Kalohan haktuir, iha karta ne’e mós haktuir ba Prezidente Repúblika kona-ba KHUNTO retira fali husi koligasaun foun ne’e hodi kontinua fó apoiu ba governu daualu.

“KHUNTO hasees-an husi koligasaun ne’e, maibé rekejitu ne’ebé (Prezidente Repúblika) husu ami kompleta hotu ona kona-ba artigu 9 lei partidu polítiku nian,” Kalohan subliña.

Maibé nia hatutan, desizaun KHUNTO nian ne’e laiha problema ba koligasaun tanba tuir lei partidu polítiku, ba formasaun governu foun ida partidu ida labele halo koligasaun dala-rua.

Entretantu koligasaun foun lideradu CNRT forma tanba hetan orientasaun husi Prezidente Repúblika Francisco Guterres Lú Olo hodi hakotu impase polítika iha Timor Leste, maibé hafoin koligasaun ne’e forma no indijita Primeiru Ministru ba governu dasia, Kayrala Xanana Gusmão, Prezidente Repúblika seidauk halo fali desizaun ka pronunsiamentu ruma. (cao)