Suspeitu Oho Rosantina, Kumpre Hela Kastigu Suspensaun

by -127 views
Matebian Rosantina dos Santos, primeira sarjentu Polísia Nasionál Timor-Leste (PNTL), ne’ebe mate iha laen nia liman. Imajen Facebook.

Reportajen Cesaltina Ximenes/ Jaime Pires/ editor Mateus da Cruz

DILI (Timor Post)—Suspeitu AS, ne’ebé mak oho vítima Rosantina do Santos, membru Polísia Nasionál Timor-Leste, ho diviza primeiru Sarjentu, ninia estatutu hanesan arguidu ne’ebe simu hela kastigu suspensaun ba krime tolu ne’ebe maka nia komete.

Tuir faktu ne’ebé Timor post asesu hosi seksaun kriminál iha Tribunál Distritál Dili (TDD), suspeitu António Soares rejistu ho nia númeru prosesu 0184/ 19.DICMR ba krime 3, kompostu krime Furtu agravado, Danu Agravado no krime inséndiu, hasoru vítima Florencia Militantes Cabriges.

“Arguidu ne’e nia sei kastigu iha prizaun suspensaun hela,  tanba komete krime 3”,  informa ofisial justisa TDD, ba Timor post iha nia servisu fatin, kuarta (07/07).

No kazu ne’e, prosesa ho julgamentu koletivu, ne’ebé momentu prezide hosi juis Evangelino Belo.

Kondenadu ne’e momentu tribunal deside iha leitura akordaun iha loron 23 Janeiru 2020 ne’ebé hatún kastigu pena prizaun tinan 3 suspende ho ezekusaun pena hanesan.

Enkuantu, iha parte seluk, tuir Jurista Manuel Monteiro,  hatete ho arguidu nia hahalok ne’e maka laiha ona toleránsia kuandu iha desizaun ruma.

Tanba ne’e sujere ba Tribunal ba Juis prosesu atu aplika uluk lai kastigu prizaun ba periodu suspensaun ne’ebé nia kumpre hela, tinan 3.

“Antes ba kastigu ida krime oho, aplika uluk kastigu suspensaun ba prizaun tinan tolu, hafoin  iha prosesu Kondena tan krime oho, tanba hahalok hanesan ne’e labele fó toleránsia tan”, dehan jurista.

Enkuantu, tuir Kastigu krime ne’ebé juis aplika ida idak ho nia moldurasaun penal la hanesan, katak krime Furtu Agravadu nia kastigu hosi tinan 2 to’o tinan 8.

Ba krime Danu Agravdo ne’ebé previstu iha artigu 259, mós nia molurasaun penal ka kastigu hosi tinan 2 to’o tinan 8 iha prizaun ho krime Incendio previstu artigu 263, iha númeru 2 nian bele fó kastigu hosi tinan 2 to’o tinan 10 iha prizaun.

Ikus ba krime foun, ne’ebé deskonfia oho tan nia kaben bele imputa ho krime Omisídio agravadu ne’ebé previstu artigu 139 iha alinea J nia kastigu hosi tinan 12 to’o tinan 25  iha prizaun efetivu.

Matebian Membru Polísia Nasionál Timor-Leste (PNTL), Primeiru Sarjentu Rosantina Dos Santos mate, tanba la’en mak sona mate iha kuartu laran.

Kazu omicido ne’e akontese iha rezidénsia  bairru  Beto Barat, aldeia anin fuik, suku Madohi, postu administrativu Dom Aleixu ,munisípiu Dili, tersa feira kalan ne’e.

Tuir informasaun ne’ebé Timor Post rekolla katak, kronolojia hosi akontesimentu ne’e  iha tersa  kalan maizumenus tuku 11 ho balun suspeitu ba bolu matebian  iha viziñu nia uma hodi dehan atu buka tuir oan mane ne’ebé kalan ona  seidauk tama uma.

Nune’e bolu tiha mai uma mosu diskusaun entre suspeitu ho matebian  ho emosaun nune’e akontese, suspeitu lori katana taa uluk iha parte kotuk laran, hafoin lori tan tudik hodi sona iha parte kalilin hodi rezulta monu raan sai barak, tanba ne’etransporta ba iha ospitál, maibé la konsege salva nia vida, tanba kanek ho makas.

Hafoin sona, suspeitu halai sai hosi uma hodi ba entrega an iha Polísia Nasionál Kaikoli Timor-Leste Munisípiu Dili. Parte polísia tun ona iha terrenu hodi rekolla evidénsia hanesan tudik no katana ho dada ona police line iha fatin akontesimentu  hodi submete ba investigasaun.

Matebian daudaun ne’e nia isin rai iha Hospital Nasionál Guido Valadares (HNGV) hodi submete ba autópsia. Matebian ho suspeitu  nu’udar fen ho la’en iha oan na’in ida, hosi postu administrativu Venilale, munisípiu Baukau.

To’o informasaun ne’e públika, Timor Post seidauk konfirma parte Polísia Nasionál Timor-Leste. (Lee notísia seluk iha jornál Timor Post)

 

No More Posts Available.

No more pages to load.