Suspeitu Kazu Na’ok Motor Aumenta Tan Ema Na’in-2

by -969 views

Timor Post (21/01/2021)-Polisia Nasionál Timor-Leste (PNTL), Komandu Munisípiu Dili asegura tan sidadaun na’in rua TDA no ADC relasaun ho krime furtu (na’ok) motor iha públiku.

Segundu Komandante Munisípiu Dili, Superintendente Xefe Euclides Belo, deklara PNTL kaptura bazeia mandadu detensaun hosi tribunal ho númeru rejistu kriminál 0642/20, kontinuasaun ho autór na’in 3 seluk ne’ebé antes PNTL kaptura iha area suku ida iha Dili laran ba kazu ne’e.

“Komunidade sira preokupa tanba durante ne’e motor lakon barak, tanba ne’e mak Komandu PNTL munisípiu Dili servisu hamutuk ho entidade sira hotu, ezekuta mandadu detensaun hosi tribunal nian halo kapturasaun kontinuasaun ba kazu furtu ne’ebé mak iha semana hirak ba kotuk kaptura ema na’in tolu, ne’ebé agora kumpre iha prizaun preventiva”, deklara Euclides.

Autoridade polisia dehan PNTL kaptura iha loron kuarta (20/01), iha area Dom Aleixo agora kumpre detensaun 72 oras hodi aprezenta ba ministériu públiku.

Entretantu semana hirak liubá PNTL kaptura uluk sidadaun na’in 3 iha Bairru ida iha Postu Administrativu Dom Aleixo-Dili, ligadu ho krime furtu hasoru motor.(Jornalista: Jaime Pires, Editor: Mariano Martins)

No More Posts Available.

No more pages to load.