Suku Madohi Bandu Besik Mota-Tasi Ninin

by -16 views
Xefe Suku Madohi Bernardino de Cristo Ferreira 'Teki Timur'

DILI—Inundasaun iha loron 4 fulan Abríl tinan ne’e, hanesan lisaun ida atu fó hanoin ba komunidade sira labele konstrui uma iha mota laran inklui tasi ibun hodi labele fó risku ba aan rasik.

Ho ida ne’e Xefe suku Madohi, Bernardino de Cristo Ferreira, husu ba komunidade suku Madohi tomak atu labele konstrui uma iha mota laran inklui tasi ibun.

“Mota laran ho tasi ibun ha’u la aseita halo uma, tanba inundasaun ha’u la’ós maromak para salva sira nia vida,” deklara Bernardino iha sede aldeia Beto tasi suku Madohi, Kinta (24/06).

Nia hatutan, mota laran no tasi ibun la’ós lokál ba komunidade hodi hela, tanba risku boot bainhira tempu udan liuliu dezastre naturais no mota boot.

Xefe suku nee salienta, komunidade sira ne’ebé daudaun nee hela iha mota laran no tasi ibun hamutuk uma kain 20-resin, dadus nee la inklui komunidade sira ne’ebé hela iha mota ninin.

Tanba nee, hanesan autoridade identifika ona populasaun sira ne’ebé kontinua hela iha mota laran, no dadus nee submete ona ba governu hodi foti desizaun molok akontese iha tempu tuir mai.

“Maibé foin daudaun ha’u halo identifikasaun haruka ona ba governu para atu estuda antes, labele akontese tiha mak ita lufu-lafu malu, maibé nu’udar autoridade ita preokupa antesipa antes,” realsa Bernardino.(jho)