STAE RAEOA Distribui Material Eleisaun ba Sentru Votasaun 60

by -234 views
Brigada sira simu kaixa material eleisuan hodi distribui ba sentru votasaun sira iha RAEOA, Imajen TP/ ermelinda caet

(Reportajen Jose Mauno/Editor Mateus da Cruz )

Oe-Kuse — Órgaun eleitorál Sekretáriadu Tékniku Administrasaun Eleitorál (STAE) no Komisaun Nasionál Eleisaun (CNE sigla portugés) Rejiaun Administrativu Espesial Oe-Kuse Ambenu (RAEOA) distribui Material sensitivu no non sensitivu ba sentru votasaun hamutuk 60 iha RAEOA.

“Ohin ita distribui material sensitivu ho non sensitivu ba sentru votasaun ita husu ba nai maromak atu haraik grada no forsa ba ita hotu hodi hala’o eleisaun aban (ohin) ho di’ak, ulun malirin no situasaun kalma to’o susesu”, diretora STAE RAEOA, Luisa da Costa, hatete bainhira hala’o serimónia lansamentu ba distribuisaun material sensitivu no non sensitivu iha salaun Alfandega Palaban, RAEOA, segunda (18/04).

Nia dehan, ema hotu hatene ona katak eleisaun prezidensiál tenke hala’o dala rua tanba primeiru volta kandidatu na’in 16 laiha ida hetan votu 51%. Entaun kandidatu na’in hetan votu barak liu mak avansa tan ba segundu volta.

“Ohin loron importante tebes tanba atu distribui material ba sentru votasaun 60 hodi hala’o eleisaun iha loron aban (ohin) 19 Abríl 2022. Ita laiha duvida tanba iha PNTL preparadu ona atu asegura”, nia hateten.

Lusia husu ba brigada STAE sira atu tau matan no kontrola nafatin no reponsabilidade ba material sira ne’ebé distribui hodi to’o fatin ho di’ak. Nune’e mós husu ba ofisial husi CNE qtu akompana no monitoriza prosesu eleitorál tomak.

Tuir dadus husi hosi sentru votasaun 60 iha RAEOA iha  estasaun de votu hamutuk 88 iha suku 18, postu administrativu 4 no brigada hamutuk 60 hodi hala’o eleisaun prezidensiál periódu 2022-2027 segundu volta nian.

Iha fatin hanesan, reprezentante vice prezidente CNE, Adão Soares, ema hotu hatene no mundu tomak rekoñese katak prosesu eleisaun primeiru volta laiha kandidatu ida hetan votu to’o 51%, tanba ne’e estadu husu nafatin hotu-hotu nia komportamentu atu hala’o tan objetivu ida ne’e.

“Servisu tenke imparsial, to’o sentru votasaun ita tenke hatudu profisionál no imparsial tanba agora situasaun politika la’o hela. Ha’u lakohi orisida veneno tama, veneno labele tama to’o ita nia fuan”, nia hateten.

Basia ba avaliasaun monitorizasaun husi CNE nivel nasionál hatudu katak autoridade provizoriu la’o di’ak tanba ne’e tenke kontinua rezulta avaliasaun provizoriu ne’e to’o remata eleisaun prezidensiál periódu 2022-2027. (ono)

No More Posts Available.

No more pages to load.