STAE Manufahi Hahú Distribui Material Eleisaun Ba Sentru Votasaun 94

by -215 views
Kaixa material sensitivu no la sensitivu preparadu atu distribui ba sentru votasaun 94 no estasaun votu 112 iha Manufahi.

(Reportajen Korespondente Manufahi Luis Casmeiro/Editor Mateus da Cruz)

MANUFAHI— Sekretáriu Tékniku Administrasaun Eleitoral (STAE) munisípiu Manufahi, ohin, hahú distribui material sensitivu no la sensitivu ba sentru votasaun sia nulu resin haat (94) no estasaun votu atus ida sanulu resin rua (112) iha Postu Administrativu Alas, Turiskai, Same no postu Administrativu Fatuberliu, Munisípiu Manufahi.

“Sentru votasaun ho estasaun votus hirak ne’e ho total livru bulletin votu hamutuk atus sia rua nulu resin ualu (928) ne’ebé sei distribui ba sentru votasaun no estasaun votu ne’ebé iha”, Diretór STAE munisípiu Manufahi, Angelo da Costa Corte Real, hafoin seremonia distribuisaun, iha areadores STAE Manufahi.

Nia hatete, total eleitór iha Manufahi hamutuk rihun haat nulu, atus ualu rua nulu resin lima (40.825) maka sei ezerse sira nia  direitu iha loron eleisaun aban (19/04).

“Enkuantu iha eleisaun primeira volta eleitor Manufahi kuaze rihun ualu resin mak la tuir eleisaun maibé espera katak ho edukasaun votante no kampaña eleitorál ne’ebé iha taxa partisipasaun eleitor sei aumenta iha aban dadersan”nia dehan.

Maski iha informasaun balun ne’ebé esplla iha públiku katak eleisaun segundu ronde estadu laiha osan atu selu poling staff sira maibé hatán ba asuntu ne’e Diretór STAE, Angelo hatete, orsamentu ba eleisaun iha, tanba ne’e nia husu ba poling staff hotu labele fiar ba rumoris.

“Tanba estadu no governu liu husi Ministériu Administrasaun Estatal (MAE) preve orsamentu ba eleisaun ida ne’e maibé prosesu la’o tuir regras banku nian no ha’u mós informa ona ba brigada, OSE hafoin remata eleisaun sei selu sira kada postu ida-idak ”,nia hakotu.

Tuir observasaun Timor post nota katak, seremonia distribuisaun material sensitivu no la sensitivu ne’e hetan akomapamentu husi forsa Falintil (F-FDTL) postu Betano, Batalaun Orden Públiku (BOP). Enkuantu hetan mós observasaun hosi observador Uniaun Europeia, PDHJ ho hetan mós supervizaun hosi Komisaun Nasionál Eleisaun (CNE).(Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.