STAE Baukau Distribui Material Eleisaun Ba Sentru Votasaun 125

by -165 views
Diretór STAE Munisípiu Baukau, Lucio Sslvador Freitas, (liman karuk) entrega simbólikamente kaixa votasaun ba komandante PNTL eskuadra Venilale hodi entrega ba Brigada Sentru Votasaun Lako-Uma Suku Bahamori, Postu Administrativu Venilale, Imajen TP/Caetano C Guterres

(Reportajen Caetano C. Guterres/Editor Mateus da Cruz)

BAUKAU—- Órgaun eleitorál STAE hamutuk ho Komisaun Nasionál Eleisaun (CNE-Sigla Portugés), Munisípiu Baukau distribui material sensitivu no la sensitivu ba sentru votasaun 125 no estasaun votu 150 iha Postu Administrative 6, serimónia ne’e hetan akompaña hosi PNTL no F-FDTL hodi garante prosesu distribuisaun to’o iha fatin ho seguru.

Iha diskursu, Diretór STAE Munisípiu Baukau, Lucio Salvador Freitas, husu ba prezidente meja sentru votasaun  atu firme foti desizaun ba kualkér atus ne’ebé  akontese iha sentru votasaun tanba defini klaru ona iha lei.

Nia esplika, durante prosesu votasaun la’o bainhira mosu fraude eleitorál no krime eleitorál iha sentru no estasaun votasaun  prezidente meja tenke informa lalais ba polisia tanba tuir lei haruka polisia ho forsa militár proibidu tama iha sentru votasaun bainhira la hetan autorizasaun hosi prezidente meja.

“Ita boot sira nia desizaun ha’u sei asegura ba kualkér saida de’it mak akontese maibé karik ita boot sira ragu-ragu foti desizaun bele telefone mai para ita bele asegura malu la’ós ha’u ida ko’alia mak asegura maibé lei eleitorál mak asegura ita-boot sira iha munisípiu”, nia dehan durante serimónia distribuisaun Edifísiu STAE Baukau.

Iha fatin hanesan prezidente autoridade Munisípiu Baukau, Olivio Freitas, husu ba brigadista sira atu halo ida-idak nia servisu ho professional tuir lei  eleitorál, nune’e bele garante eleisaun ida ne’ebé justu no transparénsia.

“Nu’udar autoridade munisípiu Baukau fó korajen ba ita boot sira atu foti desizaun ba kualkér altura ne’ebé akontese tuir saida mak diretór stae hateten tenke iha korredór de lei tanba ha’u lakohi foti tiha desizaun ikus mai ita boot sira ba tur fali iha kadeia ida ne’e mak ha’u lakohi”, nia fó hanoin.

Entretantu Komandante PNTL Munisípiu Baukau, Superintendente Antonio Maria de Sa, hatete komandu kontinua mantein métodu seguransa iha eleisaun prezidensiál primeiru volta, tanba ne’e PNTL no F-FDTL kontinua garante prosesu eleisaun segundu volta sei la’o ho susesu iha ambitu paz no estabilidade iha munisípiu Baukau.

“Ita nia forsa seguransa rua tantu PNTL ho F-FDTL ita sei asegura eleisaun segundu volta sei la’o di’ak”, nia dehan.(Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.