SSK Bekora Halo Atendimetu Jerál

by -130 views
ilustração

DILI (Timor Post)Sentru Saúde Komunitáriu (SSK) Bekora halo atendimentu jerál ba moras hotu-hotu, hanesan moras Infesaun Respiratóriu, moras hada’et, moras la hada’et, atendimentu ba inan isin rua no moras sira seluk tan.

Durante ne’e ami halo atendimentu ba moras hotu-hotu hanesan moras infesaun respiratóriu no, moras hada’et, moras la hada’et, ba inan sira isin rua, ba planeamentu família, imunizasaun ba labarik no tetu todan ba labarik sira, vasinasaun covid-19, emerjénsia no atendimentu, ne’ebé ami deteta moras ne’ebé mak númeru aas liu mak moras infesaun respiratóriu iha atus ida tuir fali mak moras sira seluk”, dehan Mateus de Jesus, ba jornalista Timor Post iha knaar fatin, Kuarta (08/09).

Nia hatutan, atendementu ba pasiente bazeia ba nia sintoma ne’ebé sira iha.

“Ami halo atendimentu bazeia ba sintomas hanesan isin manas, ulun moras, infesaun respiratóriu, moras da’et no moras sira seluk tan”, nia tenik.

Nia subliña, ho moras ne’ebé iha, pesoál saúde sira mós hato’o informasaun ba komunidade sira, atu nune’e sira sai ba li’ur karik sira tenke uza máskara, tanba moras infesaun respiratóriu ne’e kauza hosi rai rahun.

Aleinde ne’e iha situasaun normal, SSK Bekora loron ida halo atendimentu ba ema atus haat to’o atus lima, maibé ho SS no konfinamentu obrigatóriu loron ida atende pasiente atus rua tun mai kraik.

“Durante ne’e ami nunka hasoru difikuldade kona ai moruk,   stock ai-moruk sufisiente ba ami atu halo atendimentu ba moras sira no mós ami la hasoru difikuldade kona ba transporte”, nia salienta.

“Difikuldade ne’ebé mak ami hasoru mak fatin mak ladún di’ak atu hala’o atendimentu livre, tanba ne’e mak ba iha vasinasaun AstraZeneca no Sinovac, tau fatin sira ketak-ketak, tanba fatin mak ladún sufisiente”, nia dehan.

Nia afirma, maski situasaun konfinamentu obrigatóriu, maibé kona-ba atendimentu ba pasiente sira la’o normál, segunda to’o sesta, inklui mós emerjénsia, maternidade no sábadu no domingu loron feriadu loke ba komunidade sira.(mj2/mj9)

No More Posts Available.

No more pages to load.