SS Formoza II Menus Rekursu Umanu

by -222 views
Foto Espesial

DILI (Timor Post)-Sentru Saúde (SS) Formoza II sei menus parteira hodi halo atendimentu ba inan isin rua sira ne’ebé mak ba partu iha sentru ne’ebá.

“Durante fulan Setembru iha parteira rua de’it mak halo atendimentu ba inan isin rua hamutuk na’in tolu nulu (30) ne’ebé mai partu iha sentru saúde ne’e, maibé ekipamentu mós ladún sufisiente, problema sira ne’e mak ami hasoru”, Parteira Francisca Cardoso, ba Timor Post, iha nia knaar fatin, Bairru Formoza, Tersa (05/10/).

Nia informa, iha inan isin rua na’in 30 ne’ebé mak partu ne’e, iha na’in 26 mak partu normal no haat seluk iha problema prolongadu ajuda partu más dada ho ekipamentu vakum.

“Dezafiu ba ami hodi halo atendimentu mak menus parteira, tanba durante pandemia Covid-19 nia laran ema ladún barak, maibé situasaun normal pasiente barak, iha fulan ida ne’e atende inan partu hamutuk 80 ne’ebé ho parteira na’in rua de’it mak halo atendimentu”, nia hatutan.

“Ami husu ba governu liuliu ministériu saúde haree aumenta tan parteira atu nune’e bele halo atendimentu di’ak ba ita nia komunidade sira liuliu inan isin rua sira”, nia husu.

Inan isin rua sira ne’e iha munisípiu Dili ne’e rasik no balun mai hosi munisípiu Ermera Railaku, Likisá.

Francisca informa, durante situasaun pandemia Covid-19, pasiente ba maternidade ladún barak kompara ho situasaun normal, tanba pasiente barak ta’uk atu halo test swab, ne’ebé sira partu iha uma de’it. (pj5/pj6)

No More Posts Available.

No more pages to load.