SPTL Husu Professór Sira Simu Vasina

by -106 views
Foto Google

DILI (Timor Post)—Prezidente Sindikatu Profesór Timor-Leste (SPTL), Francisco da Costa Fernandes, husu ba profesór sira ne’ebé seidauk simu vasina, tenke hakbesik-an ba sentru saúde ka postu saúde sira hodi simu vasina.

Nia hatete, daudauk ne’e iha moras ne’ebé mak komplikadu tenke hakbesik aan ba iha parte médiku ninian atu bele hetan karta médiku ruma, no mós bele teste sira nia moras sira ne’e, para bele sai hanesan razaun ida, hodi aprezenta bainhira, karik desizaun Primeiru Ministru hatete katak la bele tama servisu ou labele servisu ona ka sira lakon sira nia servisu ne’e.

Nia haktuir, Governu iha intensaun di’ak hasai liafuan ida ne’e, ba para bele asegura ninia funsionáriu públiku sira ne’ebé sai hanesan mákina estadu hodi labele sai vítima.

“Ha’u hanoin hanesan Primeiru Ministru atu bele foti ida ne’e sai hanesan deklarasaun polítika ida, atu enkoraja ninia funsionária hotu-hotu tenke hola parte ba ninia desizaun ne’ebé mak mosu iha Konsellu Ministru katak funsionáriu hotu tenke hetan vasina para bele salva aan hosi moras ida ne’e,” hatete Francisco ba Timor Post iha ESG 04 de Setembru Balidi, Kinta (12/08).

Nune’e mós, nia dehan, deklarasaun balun ne’ebé mak sai hanesan desizaun hosi Konsellu Ministru ne’e katak, ema sira ne’ebé hanesan isin rua todan, ema sira ne’ebé fó susu labarik no ema sira ne’ebé iha moras komplikadu, ida ne’e bele hetan ou bele simu vasina, maibé tenke liuhosi teste ida para deskobre sira ne’e bele simu ou labele simu.

“Sei nia la simu, entaun tenke iha justifikasaun ruma ka hetan karta médiku ruma para bele aprezenta sai hanesan razaun, tanba dala barak funsionáriu sira, liuliu profesór sira balu bele partisipa no balu la partisipa, entaun deklarasaun Primeiru Ministru nian hanesan fanun ita atu haree oinsá mak atu ita hala’o ita nia kna’ar no bele salva ita nia aan hosi moras da’et ne’e”, hatutan nia.

Tanba ne’e mak, deklarasaun Primeiru Ministru nian ne’e parte ida di’ak, para bele fó hanoin ba funsionáriu sira atu bele partisipa mós ba programa vasinasaun nian ne’ebé mak Governu rasik hala’o liuhosi sira nia polítika atu bele salva guarda ninia funsionáriu.

“Ha’u hanoin ida ne’e deklarasaun polítiku, parte seluk mós bele hatete katak sira ne’ebé seidauk hetan vasina sira labele tama lai servisu, ne’e mós ba parte ida hatete deklarasaun polítika atu bele enkoraja sidadaun hotu-hotu ka funsionáriu hanesan mákina estadu hodi asegura sira nia umanidade para salva aan hosi moras ida ne’e”, nia hakotu. (mj10)

No More Posts Available.

No more pages to load.