Sosiedade Sivíl Prefere OJE 2022 Foku ba Setór Lima

by -339 views
Foto Sapo

Estajiáriu MJ4 / Editór Noémio Falcão

DILI (Timor Post)Organizasan Naun Governamental (ONG) Luta Hamutuk nu’udar sosiedade sivíl ne’ebé tau matan ba progresu no dezafiu sira dezenvolvimentu nasional husu ba governu atu foku ba setór lima ne’ebé sei hakdasak.

Setór lima ne’ebé Luta Hamutuk prefere governu nia foku iha Orsamentu Jerál Estadu (OJE) tinan fiskal 2022 maka, edukasaun, saúde, agrikultura, infrastrutura liuliu estrada no turizmu.

“Ho situasaun pandemia ne’ebé mak la sertu di’ak-liu investe barak liu iha infraestrutura liuliu eskola, klínika, estrada ho infraestrutura ba iha turizmu sira no mós agrikultura,” Diretór Ezekutivu Luta Hamutuk, José Alves da Costa ba Timor Post, iha nia servisu fatin, Palapasu, Dili, loron hirak liu ba.

José dehan, governu bele ajusta de’it programa husi setór seluk iha OJE 2022 tanba haree husi kapasidade ejekusaun iha tinan hirak ikus ne’e fraku tebes. Tanba nia foti ezemplu ezekusaun tinan 2021 hela de’it fulan tolu maibé maioria ministériu sira nia ezekusaun seidauk atinji pursentu 50.

José dehan, governu dau-daun ne’e prepara hela orsamentu biliaun 1.6 iha 2022, maibé bainhira la avalia didi’ak ezekusaun antes maka problema hanesan kontinua akontese iha tinan oin.

“Ita bele husu osan boot maibé ita kuandu laiha estratéjia di’ak ruma para oinsá atu bele ezekuta osan ne’e hodi benefísiu ba ita nia povu, ha’u hanoin di’ak liu sira foku de’it lai ba bele halo,” José hatutan.

Durante ne’e governu pániku demais haree ba asuntu Coved to’o membru governu sira la foku ba sira nia ezekusaun tuir olanu no programa.

“Ha’u hanoin hanesan baibain ita hatete katak pandemia ne’e mai husi rai ida ba rai seluk husi ema ida ba ema seluk, se ita taka de’it ita nia portaun boot hanesan portu, pontu entrada internasionál hanesan fronteira terrestre ita ho Indonesia, ha’u hanoin buat ne’e fasil los ita atu bele halo ezekuta ita nia osan ne’e iha rai laran,” José subliña.

No More Posts Available.

No more pages to load.