Somocho Husu Progresu Servisu Fronteira Maritima Ba Xanana

by -4.401 views
Xefe Negosiador Fronteira Maritima, Kay Rala Xanana Gusmão dada lia ho Prezidete Komisaun 'B', José Agostinho Sequeira Somocho, Iha Parlamentu Nasionál, Sesta 21/01/2022. (Foto Timor Post/Jaime Pires)

(Reportájen Jaime Pires/Editora Suzana Cardoso)

DILI (Timor Post) – Prezidente Komisaun ‘B’ ne’ebé trata  ba asuntu negósiu estranjeiru no seguransa defeza Parlamentu Nasionál, José Agostinho Sequeira Somocho husu Progresu servisu Fronteira Maritima ba Líder Nasionál Kay Rala Xanana Gusmão.

Lee Notísia Relevante: Xanana Sama Hikas Iha Parlamentu Nasionál, Hasoru Komisaun ‘B

Remata enkontru ho Komisaun ‘B’, Sesta (21/01/2022) ba Jornalista, Lider Nasionál ne’ebé foin maka hakat ba dahuluk iha Parlamentu Nasionál hafoin konflitu hadau malu poder Prezidente Parlamentu Nasional ne’ebé akontese iha loron Domingu, (19/05/2019) liu ba ne’e hateten, nia marka prezensa tanba Prezidente Komisaun ‘B’ maka bolu.

“Ohin ami ko’alia kona-ba Fronteira Maritima. Ami hatete hotu ona prosesu negosiasaun ne’e ba sira servisu saida maka halo ona no servisu saida maka seidauk halo. No Ami mai hato’o ida ne’e ba komisaun ‘B’ nia Prezidente,  Señór Somocho,” Xanana hateten ho lia fuan badak ba Jornalista.

Aprezenta – Líder Nasionál, Kay Rala Xanana Gusmão aprezenta progresu negosiasaun fronteira maritima ba Deputadu PN iha sala komisaun ‘B’, Sesta 21/01/2022. (Foto Timor Post/Jaime Pires

Nu’udar Xefe Negosiador ba Fronteira Maritima katak Xanana,  komisaun ‘B’ Parlamentu Nasionál ne’ebé hare ba polítiku externa defeza no seguransa presiza akompaña progresu hirak ne’ebé lao durante ne’e.

“Sira presiza akompaña didi’ak negosiasaun fronteira terrestre ho maritima. Nune’e mak komisaun ‘B’ Parlamentu Nasionál bolu ami mai para aprezenta hotu progresu servisu sira durante ne’e. Ami fó hatene tiha ona servisu saida mak halo ona iha fronteira Maritima. Saida mak sei halo no saida mak seidauk halo. Ami fó hatene hotu ona,” katak Lider Nasionál ne’e hodi hakiduk sae daudaun kareta para husik hela Parlamentu Nasionál.(Lee Notísia Seluk iha Jornál Timor Post/Asesu You Tube Timor Post)

No More Posts Available.

No more pages to load.