Solusaun Tolu ba Problema Bee Iha Timor-Leste

by -256 views

LAGA (Timor Post)-Krize bee moos sei enfrenta hosi populasaun iha territóriu nasionál inklui populasaun Dili liu iha tempu bai-loro.

Normalmente, populasaun ne’ebé situasaun krize ne’e barak kuru fali bee mota, balun la’o ain to’o kilómetru. Maiske persentajen populasaun asesu bee boot iha sensus 2015 maibé realidade bee sei sai problema.

Atu solusiona problema refere, atu garante kontinuasaun nesesidade populasaun ba bee, parte Konsellu Administrasaun Bee Timor-Leste Empreza Públiku (BTL.ep) oposta polítiku tolu.

“Primeiru sistema bee sira ne’ebé agora iha area urbana BTL responsabiliza atu jere hodi halo operasaun no manutensaun tantu iha kapitál Dili, munisípiu to’o postu administrativu, no hakotu ema sira ne’ebé halo ligasaun illegal, tempu hanesan monta meteran para konsumidór sira selu.

Segundu, mantein apoiu Grupu Maneja Fasilidade (GMF) ne’ebé iha area urbana para sira bele ezerse sira nia funsaun para halo manutensaun ba sistema bee sira iha area rural. Terseiru, BTL promove projetu foun iha area sira ne’ebé komunidade sira la asesu bee tanba iha tinan 2019 diresaun jerál água nia tempu promove 53 projetu” hatete prezidente BTL.ep Carlos T. dos Reis ba Timor Post iha postu administrativu Laga, Domingu (26/9).

Carlos deskobre sistema la funsiona sai kauza problema bee, tanba populasaun asesu bee mós tuir census persentajen boot maibé bee la iha.

“Hare sensu 2015 nian Timor-Leste kuaze 76 porsentu mak asesu be moos iha territóriu Timor laran tomak no saneamentu foin 40 ita porsentu, signifika mezmu ita hare númeru asesu bee iha númeru ida ke boot, maibé populasaun sira kontinua halerik ba bee signifika ita nia sistema bee sira ne’e la funsiona tanba dala ruma bee matan maran halo ema barak la hetan bee moos”, dehan prezidente BTL Carlos T. Dos Reis ba Timor Post Domingu (26/9) iha postu administrativu Laga.

Aleinde ne’e, Carlos adianta, tinan ida ne’e Bee Timor-Leste sei halo melloramentu projetu bee moos iha capital postu administrative lima, Baguia, Laga, Kelikai, Venilale no Vemasse munisípiu Baukau.

“Ita target postu administrativu Baguia vila, Laga vila, Kelikai vila, Venilale vila no Vemasse vila antes tinan ida ne’e remata ha’u hakarak projetu melloramentu sistema bee la’o ona”, dehan Carlos.(gut)

No More Posts Available.

No more pages to load.