Situasaun Difisil La Hamate Espiritu Setór Privadu

by -14 views
Prezidente CCI-TL, Oscar Lima

Reportajen jornalista  Cesario de Sousa/Editora Isabel Ermelita

DILI-Maske iha situasaun covid-19 no impase polítika ne’ebé naruk maibé la hamate espíritu setór privadu sira nian, tanba setór privadu lubuk ida maka daudaun ne’e hala’o hela esportasaun produtu lokál ba nasaun Indonesia no Tailándia.

Hanesan foin lalais, iha loron Tersa-feira (15/06) ne’e, iha kompañia ualu (8) mak daudaun ne’e hala’o hela esportasaun produtu lokál hanesan, maek, kamii, kafé, kaiju, cengkeh inklui nuu maran ba estranjeiru.

Prezidente Kámara Komérsiu no Indústria Timor Leste (CCI-TL), Oscar Lima, dezafia setór privadu sira atu brani hasoru situasaun pandemia covid-19 no impase polítika ne’ebé naruk tebes ne’e.

“Ita tenke brani nafatin hanesan bloku ida, apezar ho serka sanitaria, apezar ho impase polítika ne’ebé ke naruk tebes, husi 2017 too ohin loron ita kontinua, halo nafatin ita nia atividade,” Oscar Lima koalia asuntu ne’e, iha lansamentu produtu esportasaun, iha Kolmera, Tersa (15/06).

Tuir Oscar, atividade esportasaun ne’e di’ak tebes tanba ne’e presiza empreza sira, atu mantein ho produtu sira ne’ebé iha, nune’e bele hamorin naran empreza ninian inklui nasaun nian iha rai liur.

Alende ne’e, nia mos husu ba emprezáriu timoroan sira atu kria kondisaun ba asaun esportadór sira, nune’e nasaun sira ne’e bele iha konfiansa. Portantu, area esportasaun produtu lokál ba tinan tolunulu nia laran.

“Tenke kria kondisaun ba ema, para ema bele iha konfiansa ba ita, kuandu laiha konfiansa ba ita, susar ita atu la’o, maibé ha’u hanoin area ida ne’ebé ita boot sira la’o ne’e, iha tinan tolunulu ba kotuk ha’u mós halo,” nia katak.

Portantu, Oscar Lima, kongratula emprezáriu sira ne’ebé iha vontade atu halo esportasaun, liu-liu ba nasaun viziñu Indonesia. Nia mós agradese ba embaixadór Indonesia ne’ebé sempre fó apoiu ba setór esportasaun nian.

Nia dehan, nasaun Indonesia ho Tailándia ne’e moris ho produtu lokál hanesan maek, nuu, kamii no seluk tan, tanba produtu sira ne’e sempre fó benefísiu ne’ebé maka’as tebes iha nasaun rua ne’e. (Notisia seluk bele lee iha jornal Timor Post)